ގެދޮރުވެރިޔާ ފްލެޓްތަކުގެ މައްސަލާގައި ހިއުމަން ރައިޓްސް ކޮމިޝަން (އެޗްއާރްސީއެމް) އިން ހައުސިން މިނިސްޓަރު ޑރ. އަލީ ހައިދަރު އަހުމަދުއާ މިއަދު ބައްދަލުކޮށްފިއެވެ.

އެޗްއާރުސީއެމް އިން މިއަދު ނެރުނު ބަޔާނެއްގައި ބުނީ ގެދޮރުވެރިޔާ މަޝްރޫޢާ ގުޅިގެން ހިއުމަން ރައިޓްސް ކޮމިޝަނުން ބަލަމުންދާ މައްސަލައާ ގުޅޭގޮތުން މިއަދު ކޮމިޝަނުގެ މެންބަރުން މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދާ ބައްދަލުކޮށްފައިވާނެ ކަމަށެވެ. 

މި ބައްދަލުވުމުގައި ކޮމިޝަނުން ބަލަމުންދާ މައްސަލައަށް ބޭނުންވާ މަޢުލޫމާތު ހޯދުމުގެ އިތުރުން، ހައުސިންގ މިނިސްޓްރީއިން ގެދޮރުވެރިޔާ މަޝްރޫޢާ ގުޅޭގޮތުން މިހާރު ކުރަމުންދާ މަސައްކަތްތަކުގެ އަޕްޑޭޓް ވެސް ހޯދާފައިވާނެކަމަށް އެބަޔާނުގައި ބުނެފައިވެއެވެ.

Advertisement

އެޗްއާރުސީއެމްގެ ބަޔާނުގައި އިތުރަށް ބުނެފައިވަނީ ރައްޔިތުންގެ ގިނަ ކަންބޮޑުވުންތަކެއް ހުރި މި މައްސަލައަށް އަވަސް މުއްދަތެއްގެ ތެރޭގައި ޙައްލެއް ހޯދުމަށް ކަމާ ގުޅުންހުރި އިދާރާތަކާ ގުޅިގެން މަސައްކަތްކުރަމުންދާ ކަމަށް ހައުސިންގ މިނިސްޓްރީން މަޢުލޫމާތު ދީފައިވާ ކަމަށެވެ.

ކޮމިޝަނުން ބަލަމުންދަނީ ސީދާ ކޮންމައްސަލައެއްކަން ބަޔާންކޮށްފައި ނުވިޔަސް މައުލޫމާތު ލިބިފައިވާ ގޮތުގައި ކޮމިޝަނުން ބަލަމުންދާ މައްސަލައަކީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގައި އިއުލާންކުރި ގެދޮރުވެރިޔާ ސްކީމްގެ ދަށުން ދޭން ނިންމާފައިވާ 4،000 ފްލެޓްގެ މައްސަލައިގައި ހުށަހެޅިފައިވާ ޝަކުވާތަކެއްގެ މައްސަލައެވެ.

އެ ފްލެޓުތައް ހަދަނީ 17-18 ބުރީގެ 32 ޓަވަރުގައެވެ. ކޮންމެ ފްލޯއެއްގައި އަށް އެޕާޓްމެންޓް ހުންނައިރު، އޭގެ ތެރޭގައި ދެ ކޮޓަރީގެ 1،200 ފްލެޓާއި ތިން ކޮޓަރީގެ 2،800 ފްލެޓް ހިމެނެއެވެ. މި މަޝްރޫއު ހިންގަނީ އިންޑިއާގެ އެގްޒިމް ބޭންކުން ދިން 227 މިލިއަން ޑޮލަރު (3.5 ބިލިއަން ރުފިޔާ)ގެ ލޯނު އެހީގައެވެ.

ހިއުމަން ރައިޓްސް ކޮމިޝަނުން ބުނީ ގިނަ އަދަދެއްގެ ރައްޔިތުންގެ ކަންބޮޑުވުންތަކެއް ހުރި މި މައްސަލައަށް އަވަސް ޙައްލެއް ލިބިގެންދާނެ ކަމަށް އެކޮމިޝަނުން އުންމީދުކުރާ ކަމުގައެވެ.

މި ބައްދަލުވުން ބޭއްވުނީ މިއަދު ހައުސިންގ މިނިސްޓްރީގައެވެ.