ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން މަންކީ ޕޮކްސް (އެމްޕޮކްސް) އާ ދެކޮޅަށް ކުރަމުންދާ މަސައްކަތުގެ ތެރެއިން، ރާއްޖޭގެ ހެލްތް މިނިސްޓްރީއަށް އެމްޕޮކްސް ޓެސްޓު ކިޓުތަކެއް ފޯރުކޮށްދީފިއެވެ. މި ހަދިޔާއަކީ އެމްޕޮކްސް ފެތުރުމުގެ ނުރައްކަލާ ކުރިމަތިލުމަށް ރާއްޖެ ތައްޔާރުވުމަށް އެހީތެރިވުމުގެ ގޮތުން ދީފައިވާ އެއްޗެކެވެ.
ހެލްތް މިނިސްޓްރީން މިކަން ހާމަކޮށްފައިވަނީ އެކްސްގައި ކުރި ޕޯސްޓެއްގައެވެ. އެ ޕޯސްޓުގައި ޑަބްލިއުއެޗްއޯގެ އެހީތެރިކަމަށް ޝުކުރު އަދާކޮށް، އެމްޕޮކްސްއާ ދެކޮޅަށް ކުރާ މަސައްކަތް ހަރުދަނާކުރުމަށް އެންމެން ގުޅިގެން މަސައްކަތްކުރަމުންދާ ކަމަށް ބަޔާންކޮށްފައިވެއެވެ.
މި ހަދިޔާ ލިބުނީ، އެފްރިކާ ސަރަހައްދުން އެމްޕޮކްސްގެ އައު ވޭރިއަންޓެއް ފެނި، ޑަބްލިއުއެޗްއޯއިން އެ ބަލި މުޅި ދުނިޔެއަށް ނުރައްކަލެއްގެ ގޮތުގައި ކަނޑައަޅާފައިވަނިކޮށެވެ. މިހާރު އޭޝިޔާ ސަރަހައްދުގެ ބައެއް ޤައުމުތައް ހިމެނޭ ގޮތަށް 13 ޤައުމަކުން އެމްޕޮކްސްގެ ކޭސްތައް ރިޕޯޓުކޮށްފައިވެއެވެ. މިއީ ފާއިތުވި ދެ އަހަރުގެ ތެރޭގައި ޑަބްލިއުއެޗްއޯއިން އެމްޕޮކްސްގެ ނުރައްކާ ފާހަގަކުރި ދެވަނަ ފަހަރެވެ.
އެމްޕޮކްސްގެ ވައިރަސް އާންމުކޮށް އިންސާނުންނަށް ޖެހެނީ ބަލި ޖެހިފައިވާ ޖަނަވާރަކާ ގައިގޯޅިވުމުންނެވެ. އަދި މި ބަލި ޖެހިފައިވާ މީހެއްގެ ކިބައިން އެހެން މީހުންނަށްވެސް ފެތުރިދާނެއެވެ.
މިފަދަ ނުރައްކަލަކުން ރައްކާތެރިވުމަށްޓަކައި ޑަބްލިއުއެޗްއޯއިން ދުނިޔޭގެ އެކި ޤައުމުތަކަށް އެހީތެރިކަން ފޯރުކޮށްދެމުންދެއެވެ.
Advertisement
This content is created and paid for by advertisers and does not involve Voice Journalists
