ޑޮލަރުން އާމްދަނީ ހޯދާ ވިޔަފާރިތަކުން ޓެކްސް ޑޮލަރުން ދެއްކުމަށް ގަވާއިދު ބަދަލުކޮށްފިއެވެ.

މީރާއިން މިއަދު އާމްދަނީން ޓެކްސް ނެގުމުގެ ގަވާއިދަށް މުހިންމު އިސްލާހެއް ގެނެސްފައިވާއިރު، މި އިސްލާހުގެ ދަށުން، ރުފިޔާ ނޫން އެހެން ފައިސާއަކުން ވިޔަފާރި ކުރާ ފަރާތްތަކުން ޓެކްސް ދައްކަންޖެހޭނީ ޑޮލަރުންނެވެ. މީގެ އިތުރުން، އަންނަ މަހުގެ 31 ވަނަ ދުވަހުން ފެށިގެން މިފަދަ ކުންފުނިތަކުން މާލީ ބަޔާންތައް ތައްޔާރުކުރަންޖެހޭނީ ވެސް ޑޮލަރުންނެވެ.

އެހެންނަމަވެސް، ރުފިޔާއިން މާލީ ބަޔާން ތައްޔާރުކުރާ ކުންފުނިތަކަށް އާމްދަނީ ޓެކްސް ދެއްކުމުގައި ޑޮލަރު ނުވަތަ ރުފިޔާ ބޭނުންކުރުމުގެ އިޚްތިޔާރު ލިބިގެންދާނެއެވެ. ގަވާއިދުގެ އިސްލާހުގައި ބަޔާންކޮށްފައިވާ ގޮތުން، ރާއްޖޭގައި ވަޒަންވެރިވެފައިނުވާ ފަރާތްތަކުގެ ވިތްހޯލްޑިން ޓެކްސް، މުވައްޒަފުންގެ ވިތްހޯލްޑިން ޓެކްސް، އަދި ކެޕިޓަލް ގެއިންސް ވިތްހޯލްޑިން ޓެކްސް ވެސް ދެއްކޭނީ ޑޮލަރުން ނުވަތަ ރުފިޔާއިންނެވެ.

Advertisement

މި ބަދަލު ގެނައުމުގެ މަޤްޞަދަކީ، ޑޮލަރުން އާމްދަނީ ލިބޭ ކުންފުނިތަކުން ދައުލަތަށް ދައްކަންޖެހޭ ފައިސާ ރުފިޔާއިން ދެއްކުމަށްޓަކައި ބްލެކް މާކެޓުން ފައިސާ މާރުކުރުމުގެ މައްސަލައަށް ހައްލެއް ހޯދުމެވެ.

ބަންޑާރަ ނައިބު އަހުމަދު އުޝާމް ވިދާޅުވި ގޮތުގައި މިއީ އާންމުކޮށް ލިބެމުންދާ ޝަކުވާއެކެވެ.

ރާއްޖޭގެ އިޤްތިޞާދީ ހާލަތަށް ބަލާއިރު، ދަރަނި އިތުރުވެ، ބޭރު ފައިސާގެ ދަތިކަން ކުރިމަތިވެފައިވާ މި ދަނޑިވަޅުގައި، މި އިސްލާހަކީ ދައުލަތަށް ޑޮލަރު ލިބުން އިތުރުކޮށް، ކަޅުބާޒާރުގައި ޑޮލަރުގެ އަގު މައްޗަށް ދިއުން ހުއްޓުވުމަށް އެޅޭ ފިޔަވަޅެއް ކަމުގައި ބެލެވެއެވެ.