އަންނަ އާދިއްތަ ދުވަހު ސަރުކާރު ބަންދު ނަމަވެސް ޕާސްޕޯޓް ޚިދުމަތް ދޭނެ ކަމަށް މޯލްޑިވްސް އިމިގްރޭޝަނުން މިއަދު އިޢުލާނުކޮށްފިއެވެ.
އިމިގްރޭޝަނުން މިއަދު އެކްސް ގައި ކުރި ޕޯސްޓެއްގައި ބުނެފައިވަނީ، އަންނަ އާދިއްތަ ދުވަހު މާލޭ އޮފީހުން ޕާސްޕޯޓްގެ ޚިދުމަތް ދޭނެ ކަމަށެވެ. މީގެ އިތުރުން، ޕާސްޕޯޓަށް އެދި އިމުގާ ޕޯޓަލް މެދުވެރިކޮށް ހުށަހެޅުމުގެ ފުރުޞަތު ވެސް އޮންނާނެ ކަމަށް އެ ޕޯސްޓުގައި ފާހަގަކޮށްފައިވެއެވެ.
އިމިގްރޭޝަނުން އިތުރަށް މަޢުލޫމާތު ދެމުން ބުނެފައިވަނީ، ޕާސްޕޯޓާ ހަވާލުވުމަށް ނަންބަރު ދޫކުރުން ކިއުބީ މެދުވެރިކޮށް ހެނދުނު 08:30 އިން މެންދުރު 14:00 އަށް ކުރިއަށް ގެންދާނެ ކަމަށެވެ.
ކުރިއަށް އޮތީ ސްކޫލުތަކުގެ ޓާމު ބަންދު ކަމަށްވާތީ، ގިނަ ބަޔަކު ރާއްޖެއިން ބޭރަށް ދަތުރުކުރާނެ ކަމަށް ބެލެވެއެވެ. މިކަމާ ގުޅިގެން ޕާސްޕޯޓް ހެއްދުމަށް އެދޭ ފަރާތްތައް އިތުރުވާނެ ކަމަށް ލަފާކުރެވެއެވެ. އެހެންކަމުން، އިމިގްރޭޝަނުން މި ޚިދުމަތް ބަންދު ދުވަހެއްގައި ވެސް ދިނުމަށް ނިންމާފައިވާ ކަމަށް ބެލެވެއެވެ.
ރާއްޖެއިން ބޭރަށް ކުރު ޗުއްޓީތަކުގައި ދަތުރުކުރުމަކީ ދިވެހިންގެ މެދުގައި މިފަހަކަށް އައިސް އާންމުވެފައިވާ ކަމެކެވެ. ގިނަ ފަހަރު މި ދަތުރުތައް ކުރަނީ ސްކޫލް ޗުއްޓީތަކާއި ސަރުކާރު ބަންދު ދުވަސްތަކުގައި، އާންމުކޮށް 3-7 ދުވަހުގެ މުއްދަތަށެވެ. ދިވެހިން އެންމެ ގިނައިން ދަތުރުކުރާ ގގައުމުތަކުގެ ތެރޭގައި ސްރީލަންކާ، މެލޭޝިޔާ، ތައިލެންޑް، އިންޑިޔާ އަދި ސިންގަޕޫރު ހިމެނެއެވެ.
Advertisement
This content is created and paid for by advertisers and does not involve Voice Journalists
