ދެކުނު އެފްރިކާގެ ޤައުމުތަކުގައި ހަލުވި ސްޕީޑެއްގައި ފެތުރެމުން އަންނަ މަކުނުވިދުރި، އެންމެފަހުން މޮރޮކޯއިންވެސް ފެނިއްޖެއެވެ.

އުތުރު އެފްރިކާއަށް ނިސްބަތްވާ މޮރޮކޯގެ ހެލްތް މިނިސްޓްރީން ވަނީ، އެޤައުމުގެ މީހަކު މަކުނު ވިދުރިއަށް ފައްސިވެފައިވާކަމަށް ބުނެފައެވެ. މިއީ މިހާރު ފެތުރެމުން އަންނަ މަކުނުވިދުރީގެ ކޭހެއް އުތުރު އެފްރިކާގެ ޤައުމަކުން ފެނުނު ފުރަތަމަ ފަހަރެވެ.

އެފްރިކާ ބައްރުގެ 15 ޤައުމަކުން މިހާތަނަށް މަކުނުވިދުރީގެ ކޭސްތައް ފެނިފައިވާއިރު މަކުނުވިދުރީގެ 21300 ކޭސް ފެނިފައިވާކަމަށާއި 620 މީހަކު މި ބަލީގައި މަރުވެފައިވާކަމަށް ތަފާސް ހިސާބުތަކުން ދައްކައެވެ.

Advertisement

މި ހާތަނަށް ބުރުންޑީ، ކެމަރޫން، ސެންޓްރަލް އެފްރިކަން ރިޕަބްލިކް، ޑިމޮކްރެޓިކް ރިޕަބްލިކް އޮފް ކޮންގޯ، ގާނާ، އައިވަރީ ކޯސްޓް، ކެންޔާ، ލައިބީރިއާ، މޮޒަމްބިކް، ނައިޖީރިއާ، ޕާކިސްތާން، ފިލިޕީންސް، ރިޕަބްލިކް އޮފް ކޮންގޯ، ރުވާންޑާ، ސައުތު އެފްރިކާ، ސްވިޑަން، ތައިލެންޑް  ޔުގެންޑާ އަދި މޮރޮކޯ އިންވަނީ މަކުނު ވިދުރި ފެނިފައެވެ.

އެމްޕޮކްސް ފެތުރެމުންދާއިރު، 1ބީ ގެ ކޭސްތަކާ މެދު ކަންބޮޑުވުން ތައް އިތުރުވަމިންދާކަމަށް ދުނިޔޭގެ ސިއްހަތާބެހޭ ޖަމިއްޔާ ޑަބްލިއު އެޗްއޯއިން ވަނީ ބުނެފައެވެ.

ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވަނީ މި ވައިރަހަކީ ބައިނަލްއަގުވާމީ ގޮތުން ކަންބޮޑުވާ އާންމު ސިއްހަތުގެ ކުއްލި ނުރައްކަލުގެ ހާލަތެއްގެ ގޮތުގައި ކަނޑައަޅާފައެވެ. ނަމަވެސް އެމްޕޮކްސް އަކީ "އާ ކޮވިޑް ނޫން" ކަމަށްވެސް ވަނީ ބުނެފައެވެ.މިއީ ފާއިތުވި ދެ އަހަރުގެ ތެރޭގައި ދުނިޔޭގެ ސިއްހަތާ ބެހޭ އިދާރާއިން އެމްޕޮކްސްއާ ގުޅިގެން އިމަޖެންސީ އެލާޓް ނެރުނު ދެވަނަ ފަހަރެވެ.

ވައިރަހަކުން ޖެހޭ މި ބަލި ޖެހުމުން، ފްލޫ ފަދަ އަލާމާތްތައް ފެނުމާއި އެކު ގައިގައި ފޮޅުތަކެއް ނަގައެވެ. މި ބަލީގެ ސަބަބުން ބައެއް ފަހަރު ފުރާނައަށް ނުރައްކާތެރިވާއިރު، ކުޑަކުދިންނާއި، މާބަނޑު އަންހެނުންނާއި، އެޗްއައިވީ ފަދަ ބަލިތަކުގެ ސަބަބުން ހަށިގަނޑުގެ ދިފާޢީ ނިޒާމު ބަލިކަށިވެފައިވާ މީހުންނަށް މި ބަލީގެ ނުރައްކާ ބޮޑެވެ.

އެފްރިކާ ބައްރުގައި މަކުނުވިދުރި ފެތުރެމުން އަންނައިރު މި ބަލި ރާއްޖެ އަތުވެދާނެ ހާލަތަކަށް ތައްޔާރުވަމުން އަންނަކަމަށް ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން ބުނެފައިވެއެވެ.