މާލޭގެ ފަސް ގެއެއް ބަލައިފާސްކޮށް، ފަސް ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފިއެވެ.

މާލޭގައި ހިންގި ޚާއްޞަ އޮޕަރޭޝަނެއްގައި ފަސް ގެއެއް ބަލައިފާސްކޮށް، ފަސް ބިދޭސީއަކު އިމިގްރޭޝަނުގެ ބެލުމުގެ ދަށަށް ގެންގޮސްފައިވާއިރު، މި އޮޕަރޭޝަނަކީ މޯލްޑިވްސް އިމިގްރޭޝަނުން ބިދޭސީން ދިރިއުޅޭ ތަންތަން ބަލައިފާސްކުރުމަށް ހިންގަމުންދާ ޚާއްޞަ އޮޕަރޭޝަނެއްގެ ބައެކެވެ.

ރާއްޖޭގައި ދިމާވެފައިވާ ބިދޭސީންގެ މައްސަލަ ހައްލުކުރުމަކީ މިހާރުގެ ސަރުކާރުގެ މުހިންމު އަމާޒެއްކަން އިމިގްރޭޝަނުން ފާހަގަކޮށްފައިވެއެވެ. މި ގޮތުން، ގަވާއިދާ ޚިލާފަށް ރާއްޖޭގައި އުޅޭ އަދި ނުގަވާއިދުން ވިޔަފާރި ހިންގާ ބިދޭސީންނާމެދު ފިޔަވަޅު އަޅަމުންދާކަން އެ އިދާރާއިން ބުނެފައިވެއެވެ.

Advertisement

އިމިގްރޭޝަނުން ދީފައިވާ މަޢުލޫމާތުގައިވާ ގޮތުން، މިހާތަނަށް 3,322 އަށްވުރެ ގިނަ ބިދޭސީން ޑީޕޯޓުކޮށްފައިވެއެވެ. މީގެ އިތުރުން، ބިދޭސީން ވަޒީފާގައި ގެންގުޅުމާ ބެހޭ ގާނޫނަށް އިސްލާހު ގެނެސް، ސެޕްޓެންބަރު 2 ވަނަ ދުވަހުން ފެށިގެން އަމަލުކުރަން ފަށާފައިވާކަންވެސް ފާހަގަކޮށްފައިވެއެވެ.

މި އޮޕަރޭޝަނަކީ ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލުކުރުމަށް އަޅަމުންދާ ފިޔަވަޅުތަކުގެ ތެރެއިން ކުރިއަށް ގެންދިޔަ އޮޕަރޭޝަނެއްކަމަށް އިމިގްރޭޝަނުން ބުނެފައިވެއެވެ. އަދި މި މަސައްކަތް ކުރިއަށް އޮތް ތަނުގައިވެސް ހަރުދަނާކަމާއެކު ކުރިއަށް ގެންދާނެކަމަށް އެ އިދާރާއިން ބުނެއެވެ.