އާންމު ރައްޔިތުންގެ ސަލާމަތާއި ރައްކާތެރިކަމަށް އަމާޒުކޮށް، ބިދޭސީން ދިރިއުޅެމުން އަންނަ ތަންތަން ބަލައި ފާސްކުރުމަށް ހިންގަމުންދާ އޮޕަރޭޝަނެއްގައި މިއަދު މާލޭގެ ފަސް ގެއަކުން ތިން ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މޯލްޑިވްސް އިމިގްރޭޝަނުން މި މަޢުލޫމާތު ހާމަކުރި ނަމަވެސް، ހައްޔަރުކުރެވުނު ބިދޭސީންގެ ޤައުމީ ނިސްބަތާއި އެމީހުން ހައްޔަރުކުރެވުނު ސަބަބުތަކާ ބެހޭ އިތުރު ތަފްސީލެއް ހާމަކޮށްފައެއް ނުވެއެވެ. އެހެންނަމަވެސް، މި އޮޕަރޭޝަނަކީ ޤާނޫނާ ޚިލާފަށް ރާއްޖޭގައި ދިރިއުޅެމުންދާ ބިދޭސީން ހޯދައި، އެމީހުންނާމެދު ޤާނޫނީ ފިޔަވަޅު އެޅުމަށް ކުރިއަށްގެންދާ މަސައްކަތެއްކަން އެނގެއެވެ.
މި އޮޕަރޭޝަންގެ ދަށުން، އިމިގްރޭޝަން އޮފިސަރުން ވަނީ މާލޭގެ އެކި ސަރަޙައްދުތަކުގައި ހުރި ފަސް ގެއަކަށް ވަދެ ބަލައި ފާސްކޮށްފައެވެ. މި މަސައްކަތް ކުރިއަށް ގެންދަނީ ކަމާބެހޭ އެހެނިހެން މުއައްސަސާތަކާ ގުޅިގެންކަމަށް އިމިގްރޭޝަނުން ބުނެފައިވެއެވެ.
އިމިގްރޭޝަނާ ގުޅުންހުރި މައްސަލަތައް ރިޕޯޓްކުރުމަށް ގާއިމުކޮށްފައިވާ "އިމިގްރޭޝަން ވޮޗް" އަށް މިބާވަތުގެ 600 އަށްވުރެ ގިނަ މައްސަލަ މިހާތަނަށް ރިޕޯޓް ކޮށްފައިވާ ކަމަށް މޯލްޑިވްސް އިމިގްރޭޝަނުން ވަނީ ހާމަކޮށްފައެެވެ.
އިމިގްރޭޝަނުން ބުނި ގޮތުގައި މިމަހުގެ 10 ވަނަ ދުވަހާއި ހަމައަށް 626 މައްސަލަ އިމިގްރޭޝަން ވޮޗަށް ހުށަހަޅާފައިވެއެވެ.
މީގެ ތެރެއިން 496 މައްސަލަ ބަލަމުންދާ ކަމަށްވެސް އިމިގްރޭޝަނުން ވަނީ ބުނެފައެވެ.
Advertisement
This content is created and paid for by advertisers and does not involve Voice Journalists
