ޔޫއެންއެފްޕީއޭއާއެކު ގާތް ގުޅުމެއް ބަދަހިކުރުމަށް ރާއްޖެއިން މަޝްވަރާކޮށްފިއެވެ. 

އިންޑޮނޭޝިޔާގެ ބާލީގައި މި މަހު 11 އިން 13 އަށް ބޭއްވުނު "ރީޖަނަލް ކޮންފަރެންސް އޮން ޕޮޕިއުލޭޝަން އޭޖިން" ގައި ބައިވެރިވެވަޑައިގެން، މިނިސްޓަރ އޮފް ޖެންޑަރ، ފެމިލީ އެންޑް ސޯޝަލް ސަރވިސަސް ޑރ. ޢައިޝަތު ޝިހާމް ވަނީ ޔޫއެންއެފްޕީއޭއާއެކު ގާތް ގުޅުމެއް ބަދަހިކުރުމަށް މަޝްވަރާކުރައްވާފައެވެ.

400 އަށްވުރެ ގިނަ މަންދޫބުން ބައިވެރިވި މި ކޮންފަރެންސްގައި މިނިސްޓަރ ޑރ. ޢައިޝަތު ޝިހާމް ވަނީ ޔޫއެންއެފްޕީއޭގެ އެހީތެރިކަމަށް ޝުކުރު އަދާކުރައްވައި، ރާއްޖޭގެ އާބާދީގެ ބަދަލުތަކާ ބެހޭގޮތުން ވާހަކަފުޅު ދައްކަވާފައެވެ. މީގެ އިތުރުން، މިނިސްޓަރ ވަނީ ޔޫއެންއެފްޕީއޭގެ އޭޝިޔާ ޕެސިފިކް ސަރަހައްދުގެ ޑިރެކްޓަރާ ބައްދަލުކުރައްވާފައެވެ.

Advertisement

ކޮންފަރެންސްގެ ތެރޭގައި މިނިސްޓަރ ޑރ. ޢައިޝަތު ޝިހާމް ވަނީ އެސްކޭޕްގެ ސެކެޓްރީއާވެސް ބައްދަލުކުރައްވައި، ދެ ފަރާތުން ގުޅިގެން ކުރެވިދާނެ ކަންކަމާމެދު މަޝްވަރާކުރައްވާފައެވެ. އަދި މި ދަތުރުފުޅުގައި މިނިސްޓަރ ވަނީ އިންޑޮނޭޝިޔާގައި ހުންނަ އިސްރަށްވެހިންގެ ކެއަރ ސެންޓަރަކަށްވެސް ޒިޔާރަތްކުރައްވާފައެވެ.

މި ކޮންފަރެންސްގައި ބައިވެރިވެވަޑައިގަތުމާއި، އެކި ފަރާތްތަކާ ބައްދަލުކުރެއްވުމުގެ ސަބަބުން، ރާއްޖެއާއި ޔޫއެންއެފްޕީއޭއާ ދެމެދު އޮތް ގުޅުން އިތުރަށް ބަދަހިވެ، އާބާދީއާ ގުޅުންހުރި ދާއިރާތަކުގައި އިތުރު އެހީތެރިކަން ލިބިގެންދާނެ ކަމަށް އުންމީދުކުރެވެއެވެ.