މަސްވެރިންގެ ޤައުމީ ދަފްތަރުގައި އޮކްޓޯބަރު 1 ގެ ކުރިން ރަޖ ރަޖިސްޓްރީވުމަށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން އެދިއްޖެއެވެ. މި ދަފްތަރަކީ މަސްވެރިންނަކީ ދައުލަތް ދަންނަ ބަޔަކަށް ހެދުމުގެ މަޤްޞަދުގައި އެކުލަވާލެވޭ ދަފްތަރެކެވެ.

މަސްވެރިކަމާއި ކަނޑުގެ ވަޞީލަތްތަކާބެހޭ ވުޒާރާއިން ނެރެފައިވާ އިއުލާނެއްގައި ބުނީ 16 ފެބްރުއަރީ 2024 ގައި "ކެޔޮޅު" ނަމަކަށް ކިޔާ ފޯނު އެޕްލިކޭޝަނެއް އިފްތިތާޙްކޮށްފައިވާނެކަމަށާއި، މި ދަފްތަރު ފުރިހަމަކުރުމަށްޓަކައި މިނިސްޓްރީން ގިނަ މަސައްކަތްތަކެއް ކޮށްފައިވާނެކަމަށެވެ. މީގެ ތެރޭގައި މަސްވެރި އުޅަނދުތަކުގެ ޒިންމާވާ ފަރާތްތަކަށް ގުޅުމާއި، މަސްވެރި ރަށްރަށާއި މަސްކިރާ ބަނދަރުތަކަށް މިނިސްޓްރީގެ މުވައްޒަފުން ދަތުރުކޮށް މަޢުލޫމާތު ދިނުން ހިމެނެއެވެ.

މި ދަފްތަރުން އެއްކުރެވޭ މަޢުލޫމާތުތަކަކީ މަސްވެރިކަމާބެހޭ ތަރައްޤީގެ މަޝްރޫޢުތައް ފަރުމާކުރުމަށާއި، މަސްވެރިންނަށް ބޭނުންވާ ޚިދުމަތްތައް ފޯރުކޮށްދިނުމަށް ސަރުކާރުން ކަނޑައަޅާފައިވާ ސިޔާސަތުތައް ތަންފީޛުކުރުމަށް މުހިންމު މަޢުލޫމާތުތަކެކެވެ.

Advertisement

އެ މިނިސްޓްރީން އިތުރަށް ބުނެފައިވަނީ 1 އޮކްޓޫބަރު 2024 އިން ފެށިގެން މަސްވެރިކަމުގެ ލައިސަންސް އައުކުރުމުގެ މަރުޙަލާގައި އުޅަނދުގެ އެންމެހައި ފަޅުވެރިން ދަފްތަރުގައި ރަޖިސްޓަރީ ކުރެވިފައިވާކަން ޔަޤީންކުރާނެ ކަމަށެވެ.

މިނިސްޓްރީން އިލްތިމާސްކޮށްފައިވަނީ ލައިސަންސް ލިބިފައިވާ އުޅަނދުތަކުގެ ފަޅުވެރިން އިސްވެދެންނެވުނު ތާރީޚުގެ ކުރިން ދަފުތަރުގައި ރަޖިސްޓަރ ކުރެވިފައިވާކަން ކެޔޮޅު ނުވަތަ އުޅަނދުގެ ވެރިފަރާތް ނުވަތަ އުޅަނދު އޮޕަރޭޓް ކޮށް އުޅަނދުގެ ކަންކަމާ ޒިންމާވާ ފަރާތުން ޔަގީންކުރުމަށެވެ.

ދަފްތަރުގައި ރަޖިސްޓަރީވުމުގައި މައްސަލައެއް ދިމާވެއްޖެނަމަ، މިނިސްޓްރީގެ ފިޝަރީޒް ކޮމްޕްލަޔަންސް ސެކްޝަންގެ ވައިބަރ ނަންބަރ (7928721) އަށް މެސެޖް ކުރުމަށް ވެސް އެ އިއުލާންގައި އެދިފައިވެއެވެ.