ރިސޯޓު ތަރައްޤީކުރުމަށް ބީލަމަށް ހުޅުވާލި ރަށްތަކާއި ފަޅުތަކުގެ ލިސްޓަށް ބަދަލު ގެނެސްފިއެވެ.

ރިސޯޓު ތަރައްޤީކުރުމަށް ބީލަމަށް ހުޅުވާލި ފަޅުތަކާއި ރަށްތަކުގެ ލިސްޓަށް ޓޫރިޒަމް މިނިސްޓްރީން ބަދަލު ގެނެސްފައިވާއިރު، މެއި މަހު ބީލަމަށް ހުށަހެޅި 17 ތަނުގެ ތެރެއިން 3 ރަށެއް އުނިކޮށް، އިތުރު 7 ފަޅެއް ލިސްޓަށް އިތުރުކޮށްފައިވެއެވެ.

ލިސްޓުން އުނިކޮށްފައިވާ ތަންތަނަކީ ޅ. ދިއްފުށި، ތ. ކަނިމީދޫ އަދި ގދ. ކަޅެހުއްޓާއެވެ. އަދި އަލަށް ލިސްޓަށް އިތުރުކޮށްފައިވަނީ:

ބ. އަތޮޅުގެ ފަޅެއް - 0.60 ހެކްޓަރު

ކ. އަތޮޅުގެ ފަޅެއް - 0.20 ހެކްޓަރު

ކ. އަތޮޅުގެ ފަޅެއް - 82 ހެކްޓަރު

ކ. އަތޮޅުގެ ފަޅެއް - 47 ހެކްޓަރު

ވ. އަތޮޅުގެ ފަޅެއް - 0.14 ހެކްޓަރު

އދ. އަތޮޅުގެ ފަޅެއް - 0.35 ހެކްޓަރު

ގދ. ރާވެރިންކޮޅިހުއްޓާ - 0.77 ހެކްޓަރު

މިނިސްޓްރީން އަންގާފައިވާ ގޮތުގައި ފަޅުތަކަށް ޕްރޮޕޯސަލް ހުށަހަޅާއިރު ވަކި ސަރަހައްދެއް ކުއްޔަށް ނަގާނަމަ އެ މަޢުލޫމާތު ހިމަނަންވާނެއެވެ. އަދި އެކުއިޒިޝަން ކޮސްޓަކީ ލީސްހޯލްޑު ޙައްޤުތައް ލިބިގަތުމަށް ކަނޑައަޅާ ފީއެއްކަން ވެސް ފާހަގަކޮށްފައިވެއެވެ.

ސަރުކާރުގެ އެއް އަމާޒަކީ ފަތުރުވެރިކަން ރާއްޖޭގެ އެކި ހިސާބުތަކަށް ފުޅާކުރުމެވެ. މީގެ އިތުރުން ނުހެދި ހުރި ރިސޯޓުތަކުގެ މަސައްކަތް ހަލުވިކުރުމަށް އިންވެސްޓަރުންނަށް އެހީތެރިކަން ފޯރުކޮށްދެމުންދާކަން ވެސް މިނިސްޓްރީން ފާހަގަކޮށްފައިވެއެވެ.

މި ބަދަލުތަކާއެކު، ރިސޯޓު ތަރައްޤީކުރުމަށް ހުޅުވާލެވިފައިވާ ފުރުޞަތުތައް އިތުރުވެ، ރާއްޖޭގެ ފަތުރުވެރިކަމުގެ ދާއިރާ އިތުރަށް ފުޅާވެގެންދާނެކަމަށް ބެލެވެއެވެ.