މިޔަންމާގައި ތޫފާން ޔާގީގެ ސަބަބުން ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން 100 އަށް ވުރެ ގިނަ މީހުން މަރުވެއްޖެ އެވެ.

އެގައުމުގެ ވެރިކަން ކުރާ ޖުންޓާގެ ތަރުޖަމާނު ޒައު މިން ތޫން އާދީއްތަ ދުވަހު ނެރުއްވި ބަޔާނެއްގައި ވިދާޅުވީ 113 މީހުން މަރުވެފައިވާކަން ކަށަވަރުވެފައިވާ ކަމަށާއި އިތުރު 64 މީހަކު ގެއްލިފައިވާ ކަމަށެވެ.

އޭއެފްޕީ ނިއުސް އެޖެންސީން ބުނި ގޮތުގައި 320،000 އަށް ވުރެ ގިނަ މީހުން ވަނީ ވަގުތީ ހިޔާތަކަށް ދާން މަޖުބޫރުވެފަ އެވެ.

މިއަހަރު އޭޝިއާގައި އުފެދުނު އެންމެ ބާރުގަދަ ތޫފާން ކަމަށްވާ ޔާގީ ވަނީ ވިއެޓްނާމާއި ލާއޯސް އާއި ޗައިނާގެ ރަށެއް ކަމަށްވާ ހައިނާން އަދި ފިލިޕީންސްގެ އެކި ހިސާބުތަކަށް އެރުމުގެ ސަބަބުން ގެއްލުން ލިބިފަ އެވެ.

މިޔަންމާއަށް ތޫފާނުގެ އަސަރު ކުރުމުގެ ކުރިން ޔާގީގެ ސަބަބުން 287 މީހުން މަރުވެފައިވާ ކަމަށް ބެލެވެ އެވެ.

މިޔަންމާގެ ދައުލަތުގެ މީޑިއާއިން ރިޕޯޓްކޮށްފައިވާ ގޮތުގައި ހުކުރު ދުވަހުގެ ހަވީރުގެ ނިޔަލަށް ގާތްގަނޑަކަށް 66،000 ގެ އެއްކޮށް ހަލާކުވެފައިވާއިރު، 375 ސްކޫލަކާއި މޮނެސްޓްރީއެއް ވަނީ ހަލާކުވެފަ އެވެ. އެތައް މަގާއި އެހެނިހެން އުމްރާނީ ވަސީލަތްތައް ވަނީ ފުނޑުފުނޑުވެފަ އެވެ.

ކުރިއަށް އޮތް ދުވަސްތަކުގައި ޔާގީ މިޔަންމާއާ ދުރަށް ދަތުރުކުރާނޭ ކަމަށް ބެލެވެ އެވެ. އަދި ކުރިއަށް އޮތް ހަފުތާގެ ތެރޭގައި ހުޅަނގު ޕެސިފިކް ސަރަހައްދުގައި އިތުރު ޓްރޮޕިކަލް ޑިޕްރެޝަނެއް އުފެދިގެން ދާނެ ކަމަށް ބެލެވެ އެވެ.