ނައިޖީރިއާގެ އިރުއުތުރުގައި އޮންނަ ޖަލެއްގެ ފާރުތައް ވެއްޓި 281 ގައިދީއަކު ފިލާފައިވާ ކަމަށް އެ ގައުމުގެ ކަމާބެހޭ ފަރާތްތަކުން ބުނެފި އެވެ.

ނައިޖީރިއާ ކަރެކްޝަނަލް ސާވިސަސްގެ ތަރުޖަމާނު އުމަރު އަބޫބަކުރު އާދިއްތަ ދުވަހުގެ ރޭ ނެރުއްވި ބަޔާނެއްގައި ވިދާޅުވީ ގައިދީން ފިލާފައިވާކަން އެނގުމުން މިދިޔަ ހަފުތާގައި މައިދުގުރީގެ މައި ޖަލު  ހުސްކުރަން އޮފިސަރުން މަސައްކަތް ކުރި ކަމަށެވެ.

ފެންބޮޑުވުމުގެ ސަބަބުން ކަރެކްޝަނަލް ފެސިލިޓީތަކުގެ ފާރުތަކުގެ އިތުރުން މީޑިއަމް ސެކިއުރިޓީ ކަސްޓޯޑިއަލް ސެންޓަރުގެ އިތުރުން އެ ސިޓީގެ ސްޓާފް ކުއާޓާތައް ވެސް ވަނީ ވެއްޓިފައި ކަމަށް އަބޫބަކުރު ވިދާޅުވި އެވެ.

Advertisement

އަދި އޭގެ ތެރެއިން ހަތް ގައިދީއަކު ސަލާމަތީ ބާރުތަކުން އަތުލައިގަނެވުނު ކަމަށާއި ބާކީ ތިބި މީހުން ހޯދުމުގެ އޮޕަރޭޝަނެއް އަދިވެސް ކުރިއަށްދާ ކަމަށް އޭނާ ވިދާޅުވި އެވެ.

ސެޕްޓެމްބަރު މަހުގެ 10 ވަނަ ދުވަހު ބޮޑު ޑޭމެއް ވެއްޓި ފެންބޮޑުވެ 30 މީހުން މަރުވެ، މިލިއަނަކަށް ވުރެ ގިނަ މީހުން ގެދޮރު ގެއްލި، ބޯނޯ ސްޓޭޓްގެ އެކި ހިސާބުތަކުން މީހުން ހުސްކުރަން ޖެހުނެވެ.

ސްޓޭޓް ސަރުކާރުން ބުނީ އާދަޔާ ހިލާފަށް ބޯކޮށް ވާރޭ ވެހުމުގެ ސަބަބުން ޑޭމް ކެޕޭސިޓީގައި ހުރި ކަމަށެވެ.

މީގެ ދެ އަހަރު ކުރިން ނައިޖީރިއާއަށް ބޯކޮށް ވާރޭވެހި ފެންބޮޑުވުމުގެ ސަބަބުން އެ ގައުމުގެ އެކި ހިސާބުތަކުގައި 600 އަށް ވުރެ ގިނަ މީހުން ވަނީ މަރުވެފަ އެވެ.
ހުޅަނގު އެފްރިކާގައި ފާއިތުވި އަހަރުތަކުގައި ފެންބޮޑުވުމުގެ ސަބަބުން 2.3 މިލިއަނަށްވުރެ ގިނަ މީހުންނަށް އަސަރުކޮށްފައިވާ އިރު، މިއީ 2023 ވަނަ އަހަރާ އަޅާބަލާއިރު ތިން ގުނަ އިތުރު އަދަދެކެވެ.