މާލޭގެ ބޭރު ތޮށި މަރާމާތު ކުރުމަށްޓަކައި ޖަޕާނު ސަރުކާރުން 20 މިލިއަން ޖަޕާނީ ޔެން (ގާތްގަނޑަކަށް 140،000 އެމެރިކާ ޑޮލަރު) ގެ ހިލޭ އެހީއެއް ދިވެހި ސަރުކާރަށް ދޭން އެއްބަސްވެއްޖެއެވެ.

މި އެހީ ދިނުމަށް އެއްބަސްވެފައިވަނީ "މާލޭގައި ކާރިސާތަކަށް ދެމެހެއްޓެނިވި ގޮތެއްގައި ތައްޔާރުވުމުގެ މަޝްރޫޢު" ފެށުމަށް މިއަދު މިނިސްޓްރީ އޮފް ފޮރިން އެފެއާޒްގައި ބޭއްވުނު ރަސްމިއްޔާތެއްގައެވެ.

މި މަޝްރޫޢުގެ އެއްބަސްވުމުގައި ސޮއިކުރެއްވީ ދިވެހިރާއްޖެއަށް ކަނޑައަޅުއްވާފައި ހުންނަވާ ޖަޕާނުގެ ސަފީރު އަލްފާޟިލާ ތަކެއުޗި މިދޯރި އާއި ދިވެހިރާއްޖޭގެ ޚާރިޖީ ވަޒީރު އަލްފާޟިލް މޫސާ ޒަމީރެވެ.

މި މަޝްރޫޢަކީ 1988 އިން 2006 އަށް ހިންގުނު މާލޭ ބޭރު ތޮށި އެޅުމުގެ ތާރީޚީ މަޝްރޫޢުގެ ދެވަނަ ފިޔަވައްސެވެ.

ޖަޕާނު އެންބަސީން ފާހަގަކޮށްފައިވާ ގޮތުން އެ މަޝްރޫޢުގެ ސަބަބުން 2004 ގެ ސުނާމީގައި މާލެއަށް ލިބުނު ގެއްލުން ކުޑަކޮށް މާލޭގެ ރައްޔިތުން ރައްކާތެރިކުރުމަށް އެހީވެދިނެވެ.

އަދި އެއީ ދެ ޤައުމުގެ ދެމެހެއްޓެނިވި ގުޅުމާއި އިތުބާރުގެ ނިޝާނެއް ކަމަށްވެސް ބުންޏެވެ.

މާލޭ ބޭރު ތޮށި މަރާމާތު ކުރުމަށް ޖަޕާނުން 140،000 ޑޮލަރުގެ ހިލޭ އެހީ ދޭން އެއްބަސްވުން: ފޮޓޯ/ ފޮރިން މިނިސްޓްރީ<br>

މީގެ އިތުރުން، މި އައު މަޝްރޫޢުގެ ދަށުން މާލޭގެ އުތުރާއި އިރުމަތީ ފަރާތުގެ ބޭރު ތޮށި އަޕްގްރޭޑްކޮށް، ފެނާ ގުޅުންހުރި ކާރިސާތަކުން ރައްކާތެރިވުމަށް އިތުރު ފިޔަވަޅުތަކެއް އެޅޭނެ ކަމަށާ، އަދި މާލޭގައި ވާރޭ ފެން ހިންދުމަށް ބޭނުންވާ ޚާއްޞަ އާލާތްތަކެއް ޖަޕާނު ސަރުކާރުން ފޯރުކޮށްދޭނެ ކަމަށް އެ އެނއބަސީން ބުނެފައިވެއެވެ.

މި މަޝްރޫޢުގެ ޑިޒައިން މަރުހަލާ ނިންމުމަށް 1 އަހަރު ދުވަސް ނަގާނެ ކަމަށް ޖަޕާނުން ލަފާކުރާއިރު، އޭގެ ފަހުން ކޮންސްޓްރަކްޝަން މަރުހަލާގައި ބޮޑު އަދަދެއްގެ ހިލޭ އެހީ ދީގެން 2027 ވަނަ އަހަރުގެ ނިޔަލަށް މާލޭ ބޭރު ތޮށި އަޕްގްރޭޑްކުރުމުގެ މަސައްކަތް ނިންމުމަށް ރޭވިފައިވާ ކަމަށްވެސް ބުނެފައިވެއެވެ.

ޖަޕާނުން އިތުރަށް ބުނީ، މި ދެ ފިޔަވަހީގެ މަޝްރޫޢު ހިންގާނީ ޖަޕާން އިންޓަރނޭޝަނަލް ކޯޕަރޭޝަން އެޖެންސީ (ޖައިކާ) އިން މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރާ ގުޅިގެން ކަމަށެވެ.

ޖަޕާނުގެ ސަރުކާރުން ވަނީ ދިވެހިރާއްޖޭގެ އިޖްތިމާޢީ އަދި އިޤްތިޞާދީ ތަރައްޤީއަށް އެހީތެރިވުމުގައި ދެމިހުންނާނެ ކަމުގެ ޔަޤީންކަން ދީފައެވެ.