ބައިޑެންއާއި ހެރިސްއަށް ހަމަލާދޭން މީހުން ނޫޅޭ ސަބަބާމެދު ސުވާލުކޮށް މަސްކް ކުރި ޕޯސްޓް ފޮހެލައިފިއެވެ.

ދުނިޔޭ އެންމެ މުއްސަނދި މަހުޖަނު ޓެސްލާގެ ސީއީއޯ އީލޮން މަސްކް އެ ޕޯސްޓް އެކްސްގައި ކުރީ އެމެރިކާ ކުރީގެ ރައީސް ޑޮނަލްޑް ޓްރަމްޕަށް ހަމަލާދޭން އުޅުނު ކަމަށް ބެލެވޭ މީހަކު ހައްޔަރުކުރި ވަގުތާ ދާދި ގާތުގައެވެ.

މަސްކް ކުރި ޕޯސްޓުގައި ވަނީ "އެކަކުވެސް ބައިޑެން/ކަމަލާއަށް ހަމަލާދޭން ނޫޅެނީ ކީއްވެ؟" މިހެންނެވެ. ނަމަވެސް، މި ޕޯސްޓް ވަނީ ފަހުން ފޮހެލާފައެވެ.

މި ޕޯސްޓާ ގުޅިގެން ގިނަ ފާޑުކިޔުންތަކެއް އައުމާއެކު، މަސްކް ވަނީ އޭނާގެ ޕޯސްޓަކީ މަޖަލަކަށް ކުރި ޕޯސްޓެއް ކަމަށް ބުނެފައެވެ. އަދި މީހުންނާއެކު ވާހަކަދައްކާއިރު ކުރާ މަޖާ، ޓެކްސްޓުގެ ގޮތުގައި ޕޯސްޓްކުރާއިރު އެހާ މަޖާވެސް ނުވާނެ ކަމަށް އޭނާ ބުނެފައިވެއެވެ.

ކުރީގެ އެމެރިކާ ނޭވަލް ވޯ ކޮލެޖުގެ ޕްރޮފެސަރެއް ކަމުގައިވާ ޓޮމް ނިކޮލަސް ވަނީ މަސްކްގެ މި ޕޯސްޓާ ގުޅިގެން ފާޑުކިޔާފައެވެ. އޭނާ ބުނީ މިފަދަ ޕޯސްޓެއް ކުރުމުން އާންމު ގޮތެއްގައި ސެކިއުރިޓީ ކްލިއަރެންސް ގެއްލޭނެ ކަމަށެވެ.

މަސްކްގެ މި ޕޯސްޓަކީ އޭނާގެ ސެކިއުރިޓީ ކްލިއަރެންސްއަށް ނުރައްކާވެދާނެ ފަދަ ޕޯސްޓެއް ކަމަށް ބެލެވެއެވެ. ކުރިންވެސް އޭނާ ވަނީ ޖޯ ރޯގަންގެ ޕޮޑްކާސްޓެއްގައި މަސްތުވާތަކެތި ބޭނުންކުރުމުގެ ސަބަބުން އޭނާގެ ސެކިއުރިޓީ ކްލިއަރެންސް މުރާޖަޢާކުރެވިފައެވެ.