ޓީޗަރުންގެ ދުވަސް ފާހަގަކުރަން ބެލެނިވެރިންގެ އަތުން ފައިސާ ނުނަގަން ރާއްޖޭގެ ހުރިހާ ސްކޫލަތަކަކަށް އަންގައިފިއެވެ. 

ކޮންމެ އަހަރެއްގެ އޮކްޓޫބަރު 5 ވަނަ ދުވަހު ފާހަގަކުރާ ބައިނަލްއަޤްވާމީ ޓީޗަރުންގެ ދުވަހާ ގުޅިގެން، ބެލެނިވެރިންގެ އަތުން ފައިސާ ނުނަގަން އެޑިޔުކޭޝަން މިނިސްޓްރީން ސްކޫލުތަކަށް އަންގައިފައިވަނީ އެމިނިސްޓްރީން ސްކޫލްތަކަށް މިއަދު ފޮނުވި ސަރކިއުލަރ އެއްގައެވެ.

ރާއްޖޭގެ ސްކޫލުތަކުގައި މި ދުވަސް ކުލަގަދަކޮށް ފާހަގަކުރަމުންދާއިރު، މިނިސްޓްރީން ނެރުނު ސަރކިއުލަރގައި ވަނީ ދަރިވަރުންނާއި ބެލެނިވެރިން ވަކިވަކި ޓީޗަރުންނަށް ހަދިޔާ ދިނުންވެސް މަނާކޮށްފައެވެ.

މިނިސްޓްރީން ބުނެފައިވާ ގޮތުގައި ޓީޗަރުންގެ ދުވަސް ފާހަގަކުރުމުގެ މައިގަނޑު މަޤްޞަދަކީ ޓީޗަރުންގެ އަގުހުރި މަސައްކަތުގެ އަގު ވަޒަންކުރުމާއި، ޓީޗަރުންގެ މުހިންމުކަން ފާހަގަކުރުމެވެ. އަދި ޤައުމު ބިނާކުރުމުގައި ޓީޗަރުންގެ ދައުރު ދަރިވަރުންނާއި މުޖުތަމަޢުއަށް ފޯރުކޮށްދިނުމެވެ.

އެޑިއުކޭޝަން މިނިސްޓްރީގެ ސާކިއުލާގައި ފާހަގަކޮށްފައިވާ ކަންކަން:

1. އަގުބޮޑު ހަފްލާތަކަށްވުރެ އިލްމީ އުފެއްދުންތެރި ހަރަކާތްތަކަށް އިސްކަންދީގެން ދުވަސް ފާހަގަ ކުރުން.

2. ޓީޗަރުންގެ ދުވަސް ފާހަގަ ކުރަން އަންނަ މަހުގެ 6 އާއި 10 އާ ދެމެދު ވަކި ދުވަހެއް ކަނޑައެޅުން

3. ހުރިހާ ހަރަކާތްތަކެއް އެއް ދުވަހެއްގެ ތެރޭގައި ބޭއްވުން

4. ކޮންމެ ދަންފަޅިއެއްގައި ވެސް 45 މިނެޓަށްވުރެ ދިގު ނުވާގޮތަށް އެސެމްބްލީއެއް ބޭއްވުން

5. ރަސްމީ ސެޝަންގެ ތެރެއިން ދެ ގަޑިއިރަށްވުރެ ދިގުނުވާ ގޮތަށް ހަރަކާތްތައް ގެންދިއުން

6. ރަށުން ބޭރުގައި ހަރަކާތްތައް ކުރިއަށް ނުގެންދިއުން

7. ދަރިވަރުން އަދި ބެލެނިވެރިންގެ ފަރާތުން ވަކިވަކި ޓީޗަރުންނަށް ހަދިޔާ ނުދިނުން

8. ޓީޗަރުންގެ ގަދަރާއި ކަރާމާތަށް އުނިކަމެއް ނާންނާނެ ގޮތަކަށް އެ ދުވަހުގެ ހަރަކާތްތައް ހިންގުން.

މިނިސްޓްރީގެ މި އިރުޝާދުތަކަކީ ޓީޗަރުންގެ ދުވަސް ފާހަގަކުރުމުގައި ހަމަހަމަކަން ގެނެސް، އެ ދުވަހުގެ އަސްލު މަޤްޞަދު ހާސިލުކުރުމަށް އެޅޭ ފިޔަވަޅެއް ކަމުގައި ބެލެވެއެވެ.