މާލޭގައި ދުއްވާ އެހެން ޒޯންތަކުގެ އުޅަނދުތަށް ޒޯން ބަދަލު ކުރެވެންދެން ހުޅުމާލެއިން ވަގުތީ ޕާކިން ހަމަޖައްސައިފިއެވެ.

މާލޭ ސަރަހައްދުގައި ދުއްވާ އެހެން ޒޯންތަކުގެ ވެހިކަލްތަކުގެ ރަޖިސްޓްރީ ބަދަލުކުރެވެންދެން، ހުޅުމާލޭގައި ވަގުތީ ގޮތުން ޕާކުކުރުމުގެ އިންތިޒާމު ސަރުކާރުން ހަމަޖައްސައިފައިވަނީ، ހުޅުމާލެ ދެވަނަ ފިޔަވަހީގެ އެމްއޭސީއެލް ފްލެޓްތައް ކައިރީ އޮންނަ ހުސް ބިމެވެ. އެ ހުސްބިމަށް އުޅަނދުތައް ގެންދިއުމަށް ފުލުހުން ވަނީ އަންގައިފައެވެ.

ފުލުހުން ބުނެފައިވާ ގޮތުގައި، އޭ ޒޯނު ފިޔަވައި އެހެން ޒޯންތަކުގެ އުޅަނދުތައް ގާނޫނާއި ގަވާއިދަށް ފެއްތުމަށް ފުރުސަތު ދެވިފައިވެއެވެ. މި ސަރަހައްދުގައި އުޅަނދުތައް ބެހެއްޓުމަށް 6 މަސް ދުވަހުގެ މުއްދަތެއް ދެވިފައިވާއިރު، އޯގަސްޓް 21 އިން ފެށިގެން އުޅަނދުތައް އެ ބިމުގައި ބެހެއްޓޭނީ ހިލޭއެވެ.

Advertisement

ފުލުހުން އިތުރަށް ބުނެފައިވަނީ ޕާކިން ޖާގައަށް ނުގެންދާ އުޅަނދުތަކުގައި ސްޓިކާ ޖަހަން ފަށާފައިވާ ކަމަށެވެ. އަދި ފުރަތަމަ 40 ދުވަހުގެ ތެރޭ އެތަނަށް ނުގެންދާ އުޅަނދުތައް ޓޯ ކުރެވޭނެ ކަމަށްވެސް އަންގާފައިވެއެވެ.

ފުލުހުންގެ ތަފާސްހިސާބުތަކުން ދައްކާ ގޮތުގައި ހުޅުމާލޭގައި ގަވާއިދާ ޚިލާފަށް 500 އަށްވުރެ ގިނަ އުޅަނދު ޕާކުކޮށްފައި ހުއްޓެވެ. މި މައްސަލަ ހައްލުކުރުމަށް ސަރުކާރުން އިތުރު ފިޔަވަޅުތަކެއް އަޅަމުންދާއިރު، ހުޅުމާލެ ފޭސް 1 ގައި ހަތަރު ފުރޮޅުލީ އުޅަނދުތަކަށް ވެސް ވަކި ޕާކިން ޖާގައެއް ހަމަޖައްސައިދީފައިވާ ކަމަށް ސަރުކާރުން ބުނެފައިވެއެވެ.