ކުށްކުރާ ކުޑަކުދިން އިޞްލާޙުކޮށް މުޖުތަމަޢަށް އަނބުރާ ގެނައުމަށް ސަރުކާރުން ޤާއިމުކުރަން ނިންމާފައިވާ "ހޯޕް އައިލެންޑް" އާއެކު، ކުޑަކުދިން ރިހެބިލިޓޭޓްކުރުމުގައި މިހާރު ދިމާވާ ގޮންޖެހުންތަކުގެ 95 އިންސައްތަ ޙައްލުވެގެންދާނެ ކަމަށް ހޯމް މިނިސްޓްރީން ބުނެފިއެވެ.

ހޯމް މިނިސްޓްރީގެ ޑެޕިއުޓީ މިނިސްޓަރު ހަސަން ވަޙީދު ވިދާޅުވި ގޮތުގައި، މިހާރު ކުޑަކުދިން ރިހެބިލިޓޭޓްކުރުމަށް ބޭނުންވާ ވަސީލަތްތަކުގެ ދަތިކަން ދިމާވާއިރު، ހޯޕް އައިލެންޑަކީ ކުޑަކުދިން ރިހެބިލިޓޭޓްކުރުމުގެ ހުރިހާ ވަސީލަތްތަކެއް އެއްތަނަކުން ލިބޭނެ ތަނެކެވެ. މީގެ އިތުރުން، ކުދިންނަށް ރަނގަޅު ފަހި ފުރުޞަތުތަކެއް މި ތަނުން ހޯދައިދެވޭނެ ކަމަށްވެސް އޭނާ ވިދާޅުވިއެވެ.

ޑިޕާޓްމަންޓް އޮފް ޖުވެނައިލް ޖަސްޓިސް (ޑީޖޭޖޭ) ގެ މަޤްޞަދަކީ ކުށްކުރާ ކުދިންނަށް އަދަބުދިނުމުގެ ބަދަލުގައި އެ ކުދިން މުޖުތަމަޢަށް އަނބުރާ ގެނައުން ކަމަށް ހަސަން ވަޙީދު ފާހަގަކުރެއްވިއެވެ. ޤާނޫނާ ފުށުއަރާ ކުޑަކުދިންގެ މައްސަލަތައް ބަލައި، އެ ކުދިން އަލުން އަނބުރާ މުޖުތަމަޢަށް ނެރުމުގެ ޒިންމާ މަތިކޮށްފައި އޮންނަނީ ޑީޖޭޖޭ އަށެވެ.

Advertisement

އެސްއެސްޓީވީގެ ބާރު ހަތަރެއްގައި ވާހަކަ ދައްކަވަމުން ހަސަން ވިދާޅުވި ގޮތުގައި، މިދިޔަ އަހަރުތަކާ އަޅާބަލާއިރު މި އަހަރު ކުޑަކުދިންގެ މައްސަލަތައް މަދުވެފައިވެއެވެ. ނަމަވެސް، ކުޑަކުދިން އެންމެ ގިނައިން ބައިވެރިވަނީ މަސްތުވާތަކެތި، މާރާމާރީ، ވައްކަން، ޖިންސީ ޢަމަލު އަދި މުދަލަށް ގެއްލުންދިނުމުގެ މައްސަލަތަކުގައި ކަމަށް އޭނާ ފާހަގަކުރެއްވިއެވެ.

މި މަޝްރޫޢުއާއެކު، ކުށުގެ ވެށިން ކުޑަކުދިން ދުރުކޮށް، އެ ކުދިން ރަނގަޅު މަގަށް ގެނައުމަށް ކުރެވޭ މަސައްކަތްތައް އިތުރަށް ހަރުދަނާވެގެންދާނެ ކަމަށް ބެލެވެއެވެ.