ސަރުކާރުން އަލަށް ތަޢާރަފުކުރި ބަންކަރިންގ ޚިދުމަތާމެދު ރައްޔިތުންގެ ހިތުގައި ޝައްކު އުފެދޭ ގޮތަށް ކުރީގެ ވެރިން ދައްކަވަމުންދާ ވާހަކަތަކަކީ ޤައުމާމެދު ހެޔޮއެދިގެން ދައްކަވާ ވާހަކަތަކެއްތޯ އެ ބޭފުޅުން އަމިއްލަފުޅަށް ސުވާލު އުފައްދަންޖެހޭ ކަމަށް އިކޮނޮމިކް މިނިސްޓަރު މުޙައްމަދު ސައީދު މިއަދު ވިދާޅުވެއްޖެއެވެ.

ހއ. ހޯރަފުށީގައި ބޭއްވުނު ބަންކަރިންގ ޚިދުމަތް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ސައީދު ވިދާޅުވީ، މި ޚިދުމަތް ފެށުމާ ގުޅިގެން ބައެއް އިސްވެރިން ވަރަށް ބޮޑަށް ޝައްކު ކުރައްވާފައިވާ ކަމަށެވެ. މި ޚިދުމަތަކީ ނުވާނެ ކަމެއް ނޫންކަން ސާބިތުކޮށްދިނުމުގެ ގޮތުން 50 އަހަރު ކުރިން މަސްދޯނިތަކުގައި އިންޖީނު އެޅުމާއި ފަތުރުވެރިކަން ފެށުމާ ގުޅޭ މިސާލުތަކެއް ސައީދު ދެއްވިއެވެ.

މިނިސްޓަރު ސައީދު ހާމަކުރެއްވި ގޮތުގައި ބަންކަރިންގ ޚިދުމަތަށް 15 އާއި 20 މިލިއަނާ ދެމެދުގެ އަދަދެއްގެ އެމެރިކާ ޑޮލަރު އެސްޓީއޯއިން އިންވެސްޓުކުރާނެއެވެ. އަދި ރައްޔިތުންނާއި އިންވެސްޓަރުންގެ ހިތުގައި ޝައްކު އުފެދޭގޮތަށް ކުރީގެ ވެރިން ވާހަކަދެއްކެވުމަކީ ޤައުމިއްޔަތާ ދެކޮޅު ވާހަކަތަކެއް ކަމަށް ވިދާޅުވިއެވެ.

އިތުރަށް ވާހަކަފުޅު ދައްކަވަމުން ސައީދު ވިދާޅުވީ، ރައީސުލްޖުމްހޫރިއްޔާއަކު މަސައްކަތް ފައްޓަވައިފިނަމަ އެކަމަށް ހިތްވަރުދޭންވާނެ ކަމަށެވެ. އަދި އިޤްތިޞާދު ބޮޑު އަޑިގަނޑެއްގައި އޮތްއިރު، އެކަމުން އަރައިގަތުމަށް އާ މަސައްކަތްތައް ފެށުން މުހިންމު ކަމަށާއި، ބަންކަރިންގ ޚިދުމަތާއެކު އިހަވަންދިއްޕޮޅު ހުޅުވައިލެވުނީ ބައިނަލްއަޤްވާމީ ބޮޑު ވިޔަފާރިއަކަށް ކަމަށްވެސް މިނިސްޓަރު ސައީދު ވިދާޅުވިއެވެ.