ރަޝިއާއާއި މެދު ހުޅަނގުން ގެންގުޅޭ ސިޔާސަތުގެ ސަބަބުން ރަޝިއާއިން ނިއުކްލިއަރ ހަނގުރާމައިގެ ސިޔާސަތު ބަދަލުކުރަން ނިންމައިފިކަމަށް އެގައުމުން ބުނެފިއެވެ.
ރަޝިއާގެ ޑެޕިއުޓީ ފޮރިން މިނިސްޓަރ ސަރގޭ ރިއަބްކޮވް ވިދާޅުވެފައިވަނީ ރަޝިއާ-ޔުކްރެއިން ހަނގުރާމައާއި ގުޅިގެން ޤައުމުތަކުން އަޅަމުންދާ ފިޔަވަޅުތަކާ ގުޅިގެން ރަޝިއާއިން ނިއުކްލިއަރ ހަނގުރާމައިގެ ސިޔާސަތު ބަދަލުކުރަން ނިންމާފައިވާ ކަމަށެވެ. މި ވާހަކަ އޭނާ ވިދާޅުވެފައިވަނީ ރަޝިއާގެ ސަރުކާރުގެ ނޫސް އޭޖެންސީ ޓާސްއަށް ދެއްވި އިންޓަވިއުއެއްގައެވެ.
ރަޝިއާ-ޔުކްރެއިން ހަނގުރާމަ ފެށުނީ 2022 ވަނަ އަހަރުގެ ފެބްރުއަރީ މަހު ރަޝިއާގެ ރައީސް ވްލަދިމީރ ޕުޓިން ޔުކްރެއިނަށް ހަމަލާދިނުމަށް އަމުރުކުރެއްވުމާ ގުޅިގެންނެވެ. މި ހަނގުރާމަ ފެށުނު ފަހުން މިހާރު ވަނީ 2 އަހަރަށްވުރެ ގިނަ ދުވަސްވެފައެވެ. ރަޝިއާއިން އަވަސް މުއްދަތެއްގެ ތެރޭގައި ޔުކްރެއިން ބަލިކޮށްލެވޭނެ ކަމަށް އުންމީދުކުރި ނަމަވެސް، ހުޅަނގުގެ ޤައުމުތަކުގެ އެހީތެރިކަމާއެކު ޔުކްރެއިނުން ވަނީ ވަރުގަދަ ދިފާޢީ ހަރަކާތްތަކެއް ހިންގާފައެވެ.
ފާއިތުވި ހަފްތާތަކުގެ ތެރޭގައި ޔުކްރެއިނުން ވަނީ ރަޝިއާގެ ސަރަޙައްދު ކުރްސްކަށް ހަމަލާދީފައެވެ. މިއީ ދެވަނަ ބޮޑު ހަނގުރާމައަށްފަހު ރަޝިއާގެ ސަރަޙައްދެއް އެހެން ޤައުމަކުން ހިފި ފުރަތަމަ ފަހަރެވެ. މީގެ އިތުރުން، ޔުކްރެއިނުން ޑްރޯން ބޭނުންކޮށްގެން ރަޝިއާގެ ނިއުކްލިއަރ ޕަވަރ ޕްލާންޓަކަށް ހަމަލާދޭން މަސައްކަތްކުރި ކަމަށް ރަޝިއާއިން ތުހުމަތުކޮށްފައިވެއެވެ.
މި ހަނގުރާމައާ ގުޅިގެން ރަޝިއާއިން ނިއުކްލިއަރ ހަތިޔާރު ބޭނުންކޮށްފާނެ ކަމުގެ ބިރުވެރިކަން ވަނީ އުފެދިފައެވެ. އިންޓަނޭޝަނަލް ކެމްޕެއިން ޓު އެބޮލިޝް ނިއުކްލިއަރ ވެޕަންސް (އައިކޭންޑަބްލިއު) އިން ބުނާ ގޮތުގައި ދުނިޔޭގެ އެހެން އެއްވެސް ޤައުމަކަށްވުރެ ގިނަ ނިއުކްލިއަރ ހަތިޔާރު ރަޝިއާގައި އެބަހުއްޓެވެ.
ރިއަބްކޮވް ވިދާޅުވި ގޮތުގައި ރަޝިއާގެ ނިއުކްލިއަރ ޑޮކްޓްރިންއަށް ބަދަލު ގެނައުމުގެ "ސާފު ނިޔަތެއް" އެބައޮތެވެ. މި ނިންމުން ނިންމާފައިވަނީ ޔުކްރެއިންގެ ހަނގުރާމައާ ގުޅިގެން " އަދާވާތްތެރިން އަޅަމުންދާ ފިޔަވަޅުތަކާ" ގުޅުވައިގެން ކަމަށް އޭނާ ވިދާޅުވިއެވެ.
މި ހަނގުރާމަ ފެށުނީއްސުރެ ރަޝިއާގެ ރައީސް ޕުޓިން ވަނީ ނިއުކްލިއަރ ހަތިޔާރާ ގުޅޭގޮތުން ކަންބޮޑުވުން އުފެދޭފަދަ ބަޔާންތަކެއް ދެއްވާފައެވެ. މިކަމުގެ ސަބަބުން ބައިނަލްއަޤްވާމީ މުޖުތަމަޢުގެ ކަންބޮޑުވުން ވަނީ އިތުރުވެފައެވެ.
ރަޝިއާއިން މިފަދަ ބަދަލެއް ގެނައުމަކީ ދުނިޔޭގެ ސަލާމަތާއި ރައްކާތެރިކަމަށް ނުރައްކާވެދާނެ ކަމެއް ކަމަށް ބައެއް ސިޔާސީ ތަޙްލީލުވެރިން ދެކެއެވެ. ނަމަވެސް ރަޝިއާއިން މިހާތަނަށް ނިއުކްލިއަރ ހަތިޔާރު ބޭނުންކުރާނެ ކަމުގެ ސީދާ އިންޒާރެއް ދީފައެއް ނުވެއެވެ.
މި ޚަބަރާ ގުޅިގެން ބައިނަލްއަޤްވާމީ މުޖުތަމަޢުން އަދި ވަކި ބަޔާނެއް ނެރެފައެއް ނުވެއެވެ. ނަމަވެސް ހުޅަނގުގެ ޤައުމުތަކުން ރަޝިއާގެ މައްޗަށް އިތުރު ފިޔަވަޅުތަކެއް އަޅާނެ ކަމަށް ލަފާކުރެވެއެވެ. ރަޝިއާ-ޔުކްރެއިން ހަނގުރާމައިގެ ކުރިމަގު އަދިވެސް ވަނީ އަނދިރިކަމުގެ ތެރޭގައެވެ.
Advertisement
This content is created and paid for by advertisers and does not involve Voice Journalists
