މި ސަރުކާރުގެ ގޮތް ނޭނގޭ ޚާރިޖީ ސިޔާސަތު ތަކާއެކުވެސް، އަވަށްޓެރި އިންޑިޔާއިން އަންނަނީ އެއީ އިތުބާރު ހިފޭ ބައުވެރިއެއްކަން ސާބިތުކޮށް ދެމުން ކަމަށް، އެމްޑީޕީގެ ރައީސް އަބްދުالله ޝާހިދު ވިދާޅުވެއްޖެ އެވެ.

އިންޑިއާ ސަރުކާރުން ދިވެހި ސަރުކާރަށް ދޫކޮށްފައިވާ 200 މިލިއަން ޑޮލަރުގެ ލޯނުގެ ތެރެއިން ނުދައްކާ އޮތް 100 މިލިއަން ޑޮލަރުގެ ތެރެއިން އިތުރު 50 މިލިއަން ޑޮލަރު ދެއްކުން އިންޑިއާއިން ފަސްކޮށްދިނުމާ ގުޅިގެން ޝާހިދު އެކްސް ގައި ކުރެއްވި ޕޯސްޓެއްގައި ވިދާޅުވީ، އިންޑިޔާއިން އެ ނިންމުން ނިންމީތީ އުފާކުރައްވާ ކަމަށެވެ. އަދި އެއީ ކުއްލި މާލީ އެހީއެއްގެ ގޮތުގައި ދެއްވި މުހިންމު އެހީއެއްކަންވެސް ފާހަގަކުރެއްވިއެވެ.  

މިއާއެކު ޝާހިދު ވަނީ ދިވެހި ރައްޔިތުންނަށް އިންޑިޔާއިން ދެއްވާ ޚޚާއްޞަ ސަމާލުކަމަށް ޝުކުރު އަދާކުރައްވައި، ހުރިހާ ގައުމުތަކާއެކު ރަހުމަތްތެރި، އެކުވެރި ގުޅުމެއް އޮތުމަކީ ކުރިއެރުމާއި ފާގަތިކަމަށް ކޮންމެހެން ބޭނުންވާ ކަމެއްކަން ފާހަގަކުރައްވާފައެވެ.

އިންޑިޔާއިން ފަސްކޮށްދިން ލޯނަކީ، 2019 ވަނަ އަހަރު ކުރީގެ ރައީސް އިބްރާހިމް މުޙައްމަދު ޞާލިޙްގެ ވެރިކަމުގައި ނަގާފައިވާ ލޯނެކެވެ. މި ލޯނު ދޫކޮށްފައިވަނީ އިންޑިއާ ސަރުކާރުގެ ގެރެންޓީގެ ދަށުން ސްޓޭޓް ބޭންކް އޮފް އިންޑިއާ (އެސްބީއައި)ގެ ރާއްޖޭގެ ބްރާންޗުންނެވެ. މި ނިންމުމާ ގުޅިގެން، އެސްބީއައިން ޓީބިލްގެ ގޮތުގައި ނަގާފައިވާ އަދަދުގެ ތެރެއިން ނުދައްކާ އޮތް 100 މިލިއަން ޑޮލަރު ދެއްކުން މިހާރު ވަނީ ފަސްކުރެވިފައެވެ.

މި ލޯނުގެ 50 މިލިއަން ޑޮލަރު ދެއްކުމުގެ ސުންގަޑި އިއްޔެގެ ނިޔަލަށް ހަމަވާއިރު، އިންޑިއާ ސަރުކާރުން ވަނީ މި ފައިސާ ދެއްކުމުގެ މުއްދަތު އިތުރު އަހަރަކަށް ދަންމާލުމަށް އެއްބަސްވެފައެވެ. މީގެ ކުރިން މޭ މަހުގައިވެސް، އެހެން 50 މިލިއަން ޑޮލަރެއް ދެއްކުމުގެ މުއްދަތު އިތުރުކޮށްދީ، އެ ޓީބިލް ރޯލްއޯވަރ ކޮށްފައިވެއެވެ.