ތޫފާން ޔާގީއާ ގުޅިގެން މިޔަންމާގައި މަރުވި މީހުންގެ އަދަދު 384 އަށް އަރާފައިވާއިރު، 89 މީހަކު ގެއްލިފައިވާ ކަމަށް ޖުންޓާ އިން ހޮނިހިރު ދުވަހު ބުނެފި އެވެ.

މީގެ ހަފުތާއެއްހާ ދުވަސް ކުރިން ވިއެޓްނާމް، ލާއޯސް، ތައިލެންޑް އަދި މިޔަންމާގެ އުތުރުގެ ސަރަހައްދުތަކަށް ޔާގީގެ އަސަރު ކުރުމުވެ ސަބަބުން ފެންބޮޑުވެ ބިންގަނޑު ކަނޑައިގެން ދިއުމުން އެ ސަރަހައްދުގެ އެތައް ސަތޭކަ ބަޔަކު ވަނީ މަރުވެފަ އެވެ.

2021 ވަނަ އަހަރުގެ އަސްކަރިއްޔާގެ ބަޣާވާތާ ގުޅިގެން ތިން އަހަރަށްވުރެ ގިނަ ދުވަސް ވަންދެން ހިނގި ހަމަނުޖެހުންތަކުގައި އެތައް މިލިއަން ބަޔަކު ގެދޮރު ގެއްލިފައިވާ ގައުމަކަށް ފެންބޮޑުވުމުގެ ސަބަބުން އިތުރު ގެއްލުންތަކަކާ ވަނީ ކުރިމަތިލާންޖެހިފަ އެވެ.

މިދިޔަ ހަފުތާ ބަންދުގައި ޖުންޓާއިން ވަނީ ކާރިސާއިން އަރައިގަތުމަށް ބޭރުގެ އެހީއަށް އެދި ބަޔާނެއް ނެރެފަ އެވެ.

ތޫފާން ޔާގީއާ ގުޅިގެން މިޔަންމާގައި މިހާތަނަށް 887،000 މީހުންނަށް އަސަރުކޮށްފައިވާ ކަމަށް އދ އިން ވަނީ ބުނެފަ އެވެ.

އެންމެ ބޮޑަށް ގެއްލުން ލިބުނު ސަރަހައްދުތައް އަދިވެސް ފެން ބޮޑުވެފައި، ގެދޮރާއި ގޭބިސީގެ މުދަލާއި ފެނުގެ ވަސީލަތްތަކާއި ކަރަންޓުގެ އިންފްރާސްޓްރަކްޗާ އަށް ވަނީ ބޮޑެތި ގެއްލުންތަކެއް ލިބިފައި،" އދ.ގެ ހިއުމެނިޓޭރިއަން އެޖެންސީ (އޯސީއެޗްއޭ) އިން ހޮނިހިރު ދުވަހު ބުނެފައިވެ އެވެ.

އަދި މަގުތަކާއި ބްރިޖާއި މުވާސަލާތީ ނެޓްވޯކްތަކާއި ސްކޫލްތަކާއި ޕަބްލިކް ސާވިސް ފެސިލިޓީތަކާއި ދީނީ ތަންތަނާއި ދަނޑުތަކާއި ދަނޑުބިންތަކަށް ބޮޑެތި ގެއްލުންތަކެއް ނުވަތަ މުޅިން ހަލާކުވެފައި ކަމަށް އެ ބަޔާނުގައި ވެ އެވެ.