ޖަޕާނުގެ މެދުތެރޭ ސަރަހައްދެއްކަމަށްވާ އިޝިކާވާ ހިސާބުގަނޑަށް ރެކޯޑް އަދަދަކަށް ވާރޭވެހި ފެންބޮޑުވެ ބިންގަނޑު ކަނޑައިގެން ދިއުމުގެ ސަބަބުން ހަ މީހަކު މަރުވެ 10 މީހަކު ގެއްލިއްޖެ އެވެ. 

މިދިޔަ ހޮނިހިރު ދުވަހުން ފެށިގެން ހޯމަ ދުވަހާ ހަމައަށް ފެންބޮޑުވުމުގެ ސަބަބުން އެންމެ ބޮޑު ގެއްލުމެއް ލިބިފައިވަނީ، މި ސަރަހައްދުތަކަށެވެ. މިއީ އަހަރުގެ ކުރީކޮޅު އައި ނުރައްކާތެރި ބިންހެލުމުގެ އަސަރުތަކުން އަރައި ނުގަވިގެންއުޅޭ ވަޖީމާ އާއި ސުޒޫގެ ސިޓީގެ ސަރަހައްދުތަކެވެ.

މަރުވި ހަ މީހުންގެ ތެރެއިން ދެ މީހަކު ފެނިފައިވަނީ ވަޖީމާގައި ބިންގަނޑު ކަނޑައިގެން ދިޔަ ޓަނަލެއްގެ ކައިރިންނެވެ. އޭގެ ތެރެއިން އެކަކީ އެ ސަރަހައްދުގެ މަރާމާތުތައް ކުރަމުން ދިޔަ ކޮންސްޓްރަކްޝަން މަސައްކަތް ކުރާ މީހެކެވެ. ބާކީ ތިބި މީހުންގެ ތެރޭގައި އުމުރުން ދުވަސްވީ ދެ ފިރިހެނުންނާއި އުމުރުން ދުވަސްވީ އަންހެނަކު ހިމެނޭ ކަމަށް ޖަޕާނު ޓައިމްސް އިން ވަނީ އެގައުމުގެ ކަމާބެހޭ ފަރާތްތަކާ ހަވާލާދީ ރިޕޯޓްކޮށްފަ އެވެ.

Advertisement

ޖަޕާނުގެ މޫސުމާ ބެހޭ އިދާރާއިން މިދިޔަ ހޮނިހިރު ދުވަހު އިޝިކާވާއަށް އެންމެ މަތީ "ފުރާނައަށް ނުރައްކާވާ" އެލާޓް ލެވެލް ނެރެފައިވީ ނަމަވެސް އާދީއްތަ ދުވަހުވަނީ އެ އެލާޓް އާންމު އިންޒާރަކަށް ދަށްކޮށްފަ އެވެ. އެހެން ނަމަވެސް ހޯމަ ދުވަހާ ހަމައަށް ބޯކޮށް ވާރޭ ވެހޭނެ ކަމުގެ އިންޒާރު ދީ، އޮފިޝަލުން ވަނީ އެކަމަށް ސަމާލުވުމަށް އިލްތިމާސްކޮށްފަ އެވެ.

ފެންބޮޑުވެ، ލިބުނު ގެއްލުންތަކުގެ ސަބަބުން އިޝިކާވާގެ ރައްޔިތުންނަށް ވަނީ އެތަކެއް ގޮންޖެހުންތަކެއް ކުރިމަތިވެފައެވެ. ހޯމަ ދުވަހު ގާތްގަނޑަކަށް 4،000 ގޭބިސީއަށް ކަރަންޓް ކެނޑިފައިވާކަމަށް އޮފިޝަލުން ވަނީ ބުނެފައެވެ. 

އިޝިކާވާގެ ހަތަރު ސިޓީއެއް ކަމަށްވާ ވާޖިމާ، ސުޒޫ އަދި ނޯޓޯ ހިމެނޭ ގޮތަށް ޖުމްލަ 40،000 އަށް ވުރެ ގިނަ މީހުން ވަނީ ހަފުތާ ބަންދުގައި ސަލާމަތީ ހިސާބުތަކަށް ގެންގޮސްފަ އެވެ. އަދި އަވަށްޓެރި ނިގާޓާ އާއި ޔަމަގަޓާ ސަރަހައްދުތަކުންވެސް ގިނަ އަދަދެއްގެ މީހުން ސަލާމަތީ ހިސާބުތަކަށް ގެންގޮސްފަ އެވެ.