ރާއްޖެ އާއި ސަޢުދީގެ ގުޅުން ބިނާވެފައިވަނީ އިސްލާމްދީނުގެ މަތިވެރި އުސޫލުތަކުގެ މައްޗަށް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ސަޢޫދީ ޢަރަބިއްޔާގެ 94 ވަނަ ޤައުމީ ދުވަހުގެ މުނާސަބަތުގައި ސޯޝަލްމީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ ދެޤައުމުގެ ދެމެދުގައި ޒަމާނުއްސުރެ އޮންނަ އިސްލާމީ ބަދަހި ގުޅުމާއި ސަޢޫދީ ރަސްކަމާއިއެކު އޮންނަ ގާތް އެކުވެރި ގުޅުމަށް ފަޚުރުވެރިވާކަމަށާއި ސަޢުދީގެ ގުޅުން ބިނާވެފައިވަނީ އިސްލާމްދީނުގެ މަތިވެރި އުސޫލުތަކުގެ މައްޗަށް ކަމަށެވެ .

ރައީސުލްޖުމްހޫރިއްޔާ ވަނީ ސަޢުދިޢަރަބިއްޔާގެ ރަސްގެފާނު ސަލްމާން ބިން ޢަބްދުލްޢަޒީޒް އަލް ސައުދަށާއި ވަލީއަހުދު އަދި ބޮޑުވަޒީރު މުޙައްމަދު ބިން ސަލްމާން ބިން ޢަބްދުލްއަޒީޒް އަލް ސައުދަށް އަދި އެ ޤައުމުގެ ހުރިހާ ރައްޔިތުންނަށް، އެޤައުމުގެ 94 ވަނަ ޤައުމީ ދުވަހުގެ ތަހުނިޔާ ވިދާޅުވެފައެވެ.

ރައީސް ޑރ. މުޢިއްޒުގެ މެސެޖުގައި ވިދާޅުވީ ދިވެހިރާއްޖެ އާއި ސަޢުދީ އަރަބިއްޔާގެ ގުޅުން ބިނާވެފައިވަނީ ޒަމާންވީ ރަޙުމަތްތެރިކަމާއި އިސްލާމްދީނުގެ މަތިވެރި އުސޫލުތަކުގެ މައްޗަށް ކަމަށެވެ. އަދި ކުރިއަށްއޮތް ތަނުގައިވެސް އެގުޅުން އިތުރަށް ބަދަހިވަމުން ދާނޭ ކަމަށް ޔަޤީން ކުރަށްވާ ކަމަށްވެސް ރައީސް ޑރ. މުޢިއްޒު ވިދާޅުވެފައިވެއެވެ.

ސަޢޫދީޢަރަބިއްޔާގެ ޤައުމީ ދުވަސް ފާހަގަކުރުމަށް ޚާއްސަ ރަސްމިއްޔާތެއް އިއްޔެ މާލޭގައި ވަނީ ބާއްވާފައެވެ. މި ހަފްލާގައި ނާއިބުރައީސް ހުސައިން މުޙައްމަދު ލަތީފު ވަނީ ބައިވެރިވެވަޑައިގަންނަވާފައެވެ.

ސައުދިއަރަބިއްޔާގެ ޤައުމީ ދުވަހަކީ އެ ޤައުމުގެ ބާނީ އަދި ކުރީގެ ރަސްގެފާނު ޢަބްދުލް ޢަޒީޒް ބިން ޢަބްދުއްރަޙްމާން އަލް ސައުދު، ހަނގުރާމައަކަށްފަހު އެ ޤައުމު އެއްބައި ކުރި ދުވަސް ފާހަގަކުރާ ދުވަހެވެ. މި ދުވަސް ފާހަގަކުރަނީ ކޮންމެ އަހަރެއްގެ ސެޕްޓެމްބަރު މަހުގެ 23 ވަނަ ދުވަހުއެވެ.