އެންމެ ރަނގަޅު ތަޢުލީމީ ދާއިރާ އޮންނަނީ ޓީޗަރުންނަށް އިޙުތިރާމް ކުރާ ޤައުމުތަކުގައިކަން ބައިނަލްއަޤްވާމީ ދިރާސާތަކުން އެނގެން އޮތް ކަމަށް ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވެއްޖެއެވެ.

މުދައްރިސުންގެ ބައިނަލްއަޤްވާމީ 7 ވަނަ މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަމުން ވަޒީރު ވިދާޅުވީ، ތައުލީމީ ދާއިރާގެ ތެރޭގައި ފާހަގަކުރެވޭ އެންމެ ބޮޑު އެއް ދަތިކަމަކީ މުދައްރިސުން މަދުވުން ކަމަށެވެ. އަދި އެއީ ބޮޑު ކަންބޮޑުވުމެއް ކަމަށާއި އަދިވެސް ޓީޗަރުން އިތުރުކުރަންޖެހޭ ކަމަށް ވަޒީރު ވިދާޅުވިއެވެ. 

މިއާއެކު ވަޒީރު ވިދާޅުވީ، ޓީޗިންގ ހަދަން ދަރިވަރުން އަންނާނީ ޓީޗަރުންގެ އަގުވަޒަން ކުރެވިގެން ކަމަށެވެ. 

އެހެންކަމުން، ގައުމު ކުރިއަރުވަން ބޭނުންވާނަމަ، ބެލެނިވެރިންނާއި ދަރިވަރުންނާއި، އަދި އެންމެހާ ފަރާތްތަކުން، ޓީޗަރުންނަށް ދޭންޖެހޭ ޤަދަރާއި ޝަރަފާއި އިޙްތިރާމާއި ލޯބި ޓީޗަރުންނަށް ދޭންޖެހޭ ކަމަށް ވަޒީރު ވިދާޅުވިއެވެ.

މީގެ އޮތުރުން ވަޒީރު ވަނީ މިއަދުގެ ބައިނަލްއަގްވާމީ މުދައްރިސުންގެ ކޮންފަރެންސްގައި ޓީޗަރުން މަދުވުމުގެ މައްސަލައާއި އެއާއި ގުޅުންހުރި ކަންކަމަށް އަލިއަޅުވާލާ، ތައުލީމީ ގޮތުން ރާއްޖެ އޮތީ ކިހާ ހިސާބެއްގަތޯ ދެނެގަތުމަކީ ވަރަށް މުހިންމު ކަމެއް ކަމަށް ވިދާޅުވެފައެވެ.

އޭރުން ތައުލީމީ ދާއިރާ ކުރިއަރުވާ، ހަރުދަނާ ކުރުމަށް މަގުފަހިވެގެންދާނެ ކަމަށް މިނިސްޓަރު ވިދާޅުވިއެވެ.

"އެޑިއުކޭޓް، އެމްޕަވާ، އެލިވޭޓް: އިކުއަޓަބަލް އެޑިއުކޭޝަން ފޯ ޓްވެންޓީ ފަސްޓް ސެންޗަރީ އެޑިއުކޭޝަން އެކްސެލެންސް"ގެ ނަމުގައި މިއަދު ފެށުނު މުދައްރިސުންގެ ކޮންފަރެންސްގައި އުނގަންނައިދޭ ފަރާތްތަކާއި ސިޔާސަތުތައް ކަނޑައަޅާ ފަރާތްތަކާއި ސްޓޭކްހޯލްޑަރުން ވަނީ ރާއްޖޭގެ އެކި ކަންކޮޅުތަކުން ބައިވެރިވެފައެވެ.

މި ކޮންފަރެންސަކީ ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ)އިން ކޮންމެ ދެ އަހަރުން އެއް އަހަރު ބާއްވަމުން އަންނަ ކޮންފަރެންސެކެވެ. އެގޮތުން، މިއަދު ފެށި ކޮންފަރެންސް މާދަމާގެ ނިޔަލަށް ކުރިއަށް ދާނެއެވެ.

އެޑިއުކޭޝަން މިނިސްޓްރީން ބުނި ގޮތުގައި މި ކޮންފަރެންސްގައި 250 ބައިވެރިން ބައިވެރިވެފައިވެއެވެ. އަދި، މި ކޮންފަރެންސްއަށް 60 ރިސާޗް ޕޭޕަރާއި، ހަތަރު ކޭސް ސްޓަޑީ ހުށަހަޅާފައިވެއެވެ. މީގެ އިތުރުން، ކޮންފަރެންސްގައި ދެ ކީނޯޓް އަދި ދެ ޕެނަލް ޑިސްކަޝަން ކުރިއަށްދާނެ ކަމަށް އެ މިނިސްޓްރީން ބުންޏެވެ.