އެމެރިކާގެ އަގުބޮޑު މިސައިލްތަކުން ދިފާއުވާ ނިޒާމް ފޫއަޅުވާލައި، އީރާނުން ތެލްއަވީވް ތެރެއަށް ފޮނުވާލި މިސެއިލްތަކާއެކު އެމެރިކާ އާއި އިޒްރާއީލަށް ކުއްލި ސިހުމެއް ލިބިއްޖެއެވެ.

އީރާނުން މިރޭގެ ވަގުތެއްގައި ވަނީ އިޒްރާއީލްގެ ތެލްއަވީވް އަށާއި، އެޤައުމުގެ މެދުތެރޭގެ އެކި ސަރަހައްދުތަކަށް ގިނަ އަދަދެއްގެ މިސައިލްތައް ފޮނުވާލާފައެވެ.

ވައިޓް ހައުސްގައި ނޫސްވެރިންނާ ވާހަކަދައްކަވަމުން އެމެރިކާގެ ނޭޝަނަލް ސެކިއުރިޓީ އެޑްވައިޒަރު ޖޭކް ސުލިވަން ވިދާޅުވީ، އިރާނުން ފޮނުވާލި 200 އެއްހާ މިސައިލް އިޒްރާއީލްގެ އެކި ސަރަހައްދުތަކަށް އަމާޒުވެފައިވާކަމަށެވެ.

Advertisement

އީރާނުން ދިން މިސައިލް ހަމަލާތަކުން ބައެއް މިސައިލްތައް އެމެރިކާ އަދި އިޒްރާއީލް ގުޅިގެން މިސައިލްތަކުން ދިފާއުވާ ނިޒާމުގެ އެހީގައި ޖައްވުގެ ތެރެއަށް ގޮއްވާލާފައިވާކަން އެނާ ފާހަގަކުރެއްވިއެވެ. އެމެރިކާގެ ނޭޝަނަލް ސެކިއުރިޓީ އެޑްވައިޒަރު ވިދާޅުވީ މިއީ ބަލައިގަނެވޭނެ ކަމެއް ނޫންކަމަށާއި، މި ހަމަލާތަކާ ގުޅިގެން އިޒްރާއީލް އާއި އެމެރިކާގެ ކަމާބެހޭ އޮފިޝަލުންގެ ކުއްލި ބައްދަލުވުމެއް ކުރިއަށްދާކަމަށެވެ. ދެން ކަންތައްތައް ކުރަންވީގޮތް ނިންމާނީ ބައްދަލުވުމަށްފަހުގައި ކަމަށް ޖޭކް ސުލިވަން ވިދާޅުވިއެވެ.

އީރާނުން ދިން މިސައިލް ހަމަލާތަކާ ގުޅޭގޮތުން އީރާނުގެ އިސްލާމިކް ރިވޮލިއުޝަނަރީ ގާޑުން ބުނީ، އެޤައުމުން އިޒްރާއީލަށް އަމާޒުކޮށް ފޮނުވާލީ އެންމެ ފަހުގެ ހައިޕަ ސޮނިކް މިސައިލްތަކެއް ކަމަށެވެ. ފޮނުވާލި މިސައިލްތަކުން ގިނަ އަދަދެއްގެ މިސައިލްތައް އިޒްރާއީލާ އެމެރިކާގެ މިސައިލްތަކުން ދިފާއުވާ ސިސްޓަމް ފޫއަޅުވާލުމަށްފަހު އިޒްރާއީލުގެ ތެރެއަށް ވާސިލްވެފައިވާކަން ރިވޮލިއުޝަނަރީ ގާޑުން ވަނީ ޔަގީންކޮށްދީފައެވެ. 

އީރާނުގެ އިސްލާމިކް ރިވޮލިއުޝަނަރީ ގާޑުން ބުނީ، މިއީ އިޒްރާއީލުން ހަމާސްގެ ލީޑަރު އިސްމާއިލް ހަނިއްޔާ އާއި ހިޒުބުﷲގެ ލީޑަރު ހަސަން ނަސްރުﷲ ޝަހީދުކޮށްލުމުން ދިން ބަދަލު ހިފުމުގެ ހަމަލާތަކެއް ކަމަށެވެ. މި ހަމަލާތަކުގައި އިޒްރާއީލް ސިފައިންގެ 3 މަރުކަޒެއް ހަލާކުކޮށްލެވިފައިވާކަމަށް އީރާނުން ބުނެއެވެ.

އީރާނުގެ ރައީސް ޑޮކްޓަރ މަސްއޫދު ޕެޒެޝްކިއާން ދައުލަތުގެ މީޑިއާ އާ ވާހަކަދައްކަވަމުން ވިދާޅުވީ، އިޒްރާއީލުގެ ބޮޑުވަޒީރު ނަތަންޔާހޫއަށް އަންގައިދޭން ބޭނުންވަނީ، އީރާނަކީ ހަނގުރާމަކުރާނޭ ޤައުމެއް ނޫންނަމަވެސް ކުރިމަތިވާ ނުރައްކާތަކާ ކެރިގެން ކުރިމަތިލާނޭކަން ކަމަށެވެ. 

ރައްދުގައި އިޒްރާއީލުގެ ޑިފެންސް މިނިސްޓްރީގެ ތަރުޖަމާން ބުނީ، އީރާނުން ދިން ހަމަލާތައް ނުރައްކާތެރިވެފައި ވަރުގަދަ ކަމަށާއި، އެ ހަމަލާތަކަށް ދޭނޭ ރައްދު އިޒްރާއީލްގައި ހުންނާނޭ ކަމަށެވެ. 

އީރާނުގެ ޤައުމީ ޓީވީން ރިޕޯޓްކޮށްފައިވަނީ ފޮނުވާލި މިސައިލްތަކުގެ 80 އިންސައްތަ އަމާޒަށް ވާސިލްވެފައިވާކަމަށެވެ. އީރާނުން އިޒްރާއީލަށް ފޮނުވާލި މިސައިލް ހަމަލާތަކުގެ ކާމިޔާބީ ފާހަގަކުރުމުގެ ގޮތުން އީރާނުގެ ރައްޔިތުން ގެންދަނީ މަގުތަކަށް ނިކުމެ އުފާފާޅުކުރަމުންނެވެ.

މި ހަމަލާތަކާ ގުޅިގެން އެމެރިކާއިން ބުނެފައިވަނީ، އިޒްރާއީލަށް ދީފާނޭ ހަމަލާއަކުން ދިފާއުވުމަށް އެޤައުމުގެ ދިފާއީބާރަށް އިތުރު އެހީދިނުމަށް ނިންމާފައިވާކަމަށެވެ.