މުދައްރިސުންނަކީ އުށްބައްތިތަކެއްފަދަ ބައެއްކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރައީސް ޑރ.މުޢިއްޒު މިފަދައިން ވިދާޅުވީ، ބައިނަލްއަގުވާމީ މުދައްރިސުންގެ ދުވަހުގެ މުނާސަބަތުގައި އެކްސްގައި ކުރެއްވި ޕޯސްޓެއްގައެވެ.
މިގޮތުން، މުދައްރިސުންނަކީ އުށްބައްތިތަކެއް ފަދަ ބައެއްގެ ގޮތުގައި ސިފަކުރައްވަމުން ރައީސް ޑރ.މުޢިއްޒު ވިދާޅުވީ، އުށްބައްތި އެހެން މީހުންނަށް އަލިކުރުމަށްޓަކައި ވިރިގެންދާކަމަށާއި، އޭގައިވާ ހުޅުކޮޅުން އެތައްހާސް ބައްތިއެއް ދިއްލައިލެވިދާނެކަމަށެވެ. އެއީ، ކޮންމެ މީހަކު އެ އަލިކަމުގެ ތެރޭން އަމިއްލައަށް ކުރިއަށް ދިޔުމަށްޓަކައިކަމަށް ރައީސް ޑރ.މުޢިއްޒު ވިދާޅުވިއެވެ.
މީގެ އިތުރުންވެސް، މިއަދު ހެނދުނު ބޭއްވި، މިއަދު ފާހަގަކުރަމުންދާ ރާއްޖެ އިސްލާމްވި ދުވަހުގެ ރަސްމީ ޖަލްސާގައިވެސް މުދައްރިސުންނާއި މުޚާތަބު ކުރައްވާ، ރައީސް ޑރ.މުޢިއްޒު ވަނީ ރާއްޖެ ގެދޮރާއި އުމްރާނީ ތަރައްޤީގެ ގޮތުން ބިނާކުރާ ފަދައިން، ފިކުރާއި ސިކުނޑީގެ ގޮތުން ބިނާކުރުމުގައި އިންސާނިއްޔަތާއި، އަޚްލާޤާއި، މާނަވީ ހަރުދަނާކަން އަދުގެ ޖީލުތަކުގައި އަށަގަންނަވަން މުދައްރިސުންގެ އެއްބާރުލުން ނިހާޔަތަށް ބޭނުންވާކަމަށް ވިދާޅުވެފައެވެ.
އަދި ދިވެހި ދަރިންނަނީ ޤައުމިއްޔަތަށް އަހުލުވެރިވާ ފަދަ ދަރިންތަކަކަށް ހެއްދެވުމަށް އެމަގުން ތަރުބިއްޔަތުކޮށްދިނުމަށް ރައީސް ވަނީ އެދިވަޑައިގަންނަވާފައެވެ.
ކޮންމެ އަހަރެއްގެވެސް އޮކްޓޯބަރުމަހުގެ 5 ވަނަ ދުވަހަކީ ބައިނަލްއަޤްވާމި ގޮތުން ފާހަގަކުރާ ދުނިޔޭގެ ޓީޗަރުންގެ ދުވަހެވެ.
Advertisement
This content is created and paid for by advertisers and does not involve Voice Journalists
