މިއަހަރުގެ މަސްވެރިންގެ ދުވަސް، ތުޅާދޫގައި ފާހަގަ ނުކުރަން ސަރުކާރުން ނިންމައިފިއެވެ.
މަސްވެރިންގެ ދުވަސް، މިއަހަރު ޤައުމީ ފެންވަރުގައި ފާހަގަކުރާގޮތަށް ނިންމާފައި އޮތީ، ބ.ތުޅާދޫގައެވެ. މިކަމަށްޓަކައި ސަރުކާރުން ކޮންމެވެސް ވަރަކަށް ތައްޔާރުވިކަންވެސް ވޮއިސްއަށް ވަނީ މައުލޫމާތު ލިބިފައެވެ.
މިކަމާ ގުޅިގެން ތުޅާދޫ ކައުންސިލުން ބުނީ، 44 ވަނަ މަސްވެރިންގެ ދުވަސް ތުޅާދޫގައި ފާހަގަކުރާގޮތަށް ސަރުކާރުން ނިންމި ނަމަވެސް، މިދުވަހާ ގުޅޭ ރަސްމިއްޔާތުތައް، މާލޭގައި ބާއްވާގޮތަށް ރައީސުލްޖުމްހޫރިއްޔާ ނިންމަވާފައިވާކަމަށް މަސްވެރިކަމާ ބެހޭ ވުޒާރާއިން ބުނެފައިވާކަމަށެވެ. ތުޅާދޫ ކައުންސިލުން ވަނީ މަސްވެރިންގެ ދުވަހަށް ތައްޔާރުވުމަށް މިހާތަނަށް އެހީތެރިވެދިން ހުރިހާ ފަރާތްތަކަށް ޝުކުރު އަދާކޮށްފައެވެ.
މިކަމާ ގުޅޭގޮތުން މަސްވެރިންގެ ވުޒާރާއިން ބަހެއް ލިބޭގޮތް އަދި ވަނީ ނުވެފައެވެ.
މަސްވެރިންގެ ދުވަސް ތުޅާދޫގައި ނުބާއްވާގޮތަށް ހަމަޖައްސާފައިވާއިރު، ސަރުކާރުން ގެންދަނީ ހަރަދު ކުޑަކުރުމުގެ ގޮތުން ފިޔަވަޅުތައް އަޅަމުންނެވެ. މިގޮތުން މީގެކުރިން ބޭއްވުމަށް ތާވަލްކުރި މިނިވަންދުވަހުގެ ހަރަކާތްތަކުގެ އިތުރުން ކުޅިވަރު އެވޯޑްވެސް ވަނީ ހަރަދުތައް ކުޑަކުރުމުގެ ސިޔާސަތުގެ ދަށުން ކެންސަލްކޮށްފައެވެ.
ރާއްޖޭގެ މާލީހާލަތު ވަރަށްބޮޑަށް ދަށަށްގޮސްފައިވާއިރު، މާލީ ހާލަތު ރަނގަޅުކުރުމަށް ސަރުކާރުން މިހާރުވެސް ގެންދަނީ ގިނަ މަސައްކަތްތަކެއް ކުރަމުންނެވެ.
Advertisement
This content is created and paid for by advertisers and does not involve Voice Journalists
