އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމާނިއަމް ޖައިޝަންކަރު، ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާ  ބައްދަލުކުރައްވައިފިއެވެ.

ޖައިޝަންކަރު ރާއްޖޭގެ ރައީސް ޑރ.މުއިއްޒުއާ ބައްދަލުކުރައްވާފައިވަނީ، ރައީސް މުއިއްޒު މިއަދު އިންޑިއާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ. 

ދެބޭފުޅުންގެ މި ބައްދަލުކުރެއްވުމާ ބެހޭގޮތުން ޖައިޝަންކަރު އެކްސްގައި ކުރެއްވި ޓްވީޓެއްގައި ވިދާޅުވީ، އިންޑިއާ އާއި ރާއްޖެއާ ދެމެދު އޮތް ގުޅުން ބަދަހިކުރެއްވުމަށް ރައީސް ޑރ.މުއިއްޒު ކުރައްވަމުން ގެންދަވާ މަސައްކަތްޕުޅުތަކުގެ އަގު ވަޒަންކުރާ ކަމަށެވެ. އަދި ބޮޑުވަޒީރާއެކު މާދަމާ ބޭއްވެވުމަށް ތާވަލްކޮށްފައި އޮތް ބައްދަލުވުންތަކަށްފަހު ދެޤައުމުގެ ގުޅުމުގެ އައު ބާބެއް ފެށިގެންދާނޭކަމަށް ޖައިޝަންކަރުގެ ޕޯސްޓްގައި ވަނީ ފާހަގަކުރައްވާފައެވެ.

Advertisement

މި ބައްދަލުވުމާ ބެހޭގޮތުން ރައީސް އޮފީހުން ބުނީ، މި ބައްދަލުވުމުގައި ދެ ޤައުމުގެ ދެމެދުގައި ހުރި މައްސަލަތަކާ ބެހޭގޮތުން މަޝްވަރާކޮށްފައިވާކަމަށެވެ.

ރައީސް ޑރ.މުއިއްޒު އިންޑިއާއަށް މި ވަޑައިގެންނެވީ، އެޤައުމުގެ ރައީސް ދުރޫޕަތީ މުރުމޫގެ ރަސްމީ ދައުވަތަކަށެވެ.

ރަައީސުލްޖުމްހޫރިއްޔާ ޑރ.މުއިއްޒުގެ މި ދަތުރުފުޅުގައި އެމަނިކުފާނުގެ އަރިހުގައި ކެބިނެޓްގައި ހިމެނިވަޑައިގަންނަވާ ވަޒީރުންވެސް ބައިވެރިވެ ވަޑައިގެންނެވިއެވެ. 

މި ދަތުރުފުޅުގައި އިންޑިއާގެ ރަައީސްގެ ފަރާތްޕުޅުން ރަސްމީގޮތުން މަރުހަބާ ދެންނެވުން ބޭއްވުމަށް ހަމަޖެހިފައިވަނީ މާދަމާއެވެ. ރަސްމީ ވާހަކަތައް ބޭއްވުމަށް ހަމަޖެހިފައިވަނީ ބޮޑުވަޒީރު ނަރެންދްރަ މޯދީގެ ރަސްމީ އޮފީހުގައެވެ. މަޝްވަރާގެ ވާހަކަތަކަށްފަހު ރަސްމީ ބަޔާން ދެއްވުމުގެ އިތުރުން ދެ ޤައުމުގެ ދެމެދުގައި އެއްބަސްވުންތަކުގައި ސޮއިކުރުން އޮންނާނޭކަމަށް ރައީސް އޮފީހުން ބުނެއެވެ.