ކޮންމެ ދުވަހެއްގެ ކެއުމާއެކު ފަތް ހިމެނުމަކީ ގިނަ ސަބަބުތަކަކާހުރެ މުހިންމު ކަމެއް ކަމުގައި ވާއިރު، މިއީ ސިއްހީ ގޮތުން ގިނަ ފައިދާތަކެއް ލިބޭ އެއްޗެކެވެ. އެހެންކަމުން ކެއުމުގައި ފަތް ހިމެނުމުގެ މުހިންމު ކަމަށް އަލިއަޅުވާލާނަމެވެ.

1. ހަށިގަނޑަށް ބޭނުންވާ މާއްދާ ތަކުން މުއްސަނދި: ފަތުގައި ޚާއްޞަކޮށް ފެހިކަން ގަދަ ފަތް، ސްޕިނެޗް، މުރަނގަފަތް، އަދި ލެޓިއުސް ފަދަ ތަކެއްޗަކީ ގިނައިން ވިޓަމިން އޭ، ވިޓަމިން ސީ، ވިޓަމިން ކޭ، ފޮލޭޓް، އަޔަން، ކެލްސިއަމް، އަދި ޕޮޓޭސިއަމް ފަދަ މުހިއްމު ވިޓަމިންތަކާއި މިނަރަލްސް ހިމެނޭ ބާވަތްތަކެވެ. މި ނިއުޓްރިއެންޓްތަކަކީ ދުޅަހެޔޮ ސިއްހަތެއްގައި ހުރުމަށް ވަރަށް މުހިންމު މާއްދާތަކެކެވެ.

2. ފައިބަރު ގިނައިން ހުންނަ: ފެހިކަންގަދަ ފަތަކީ ޑައިޓޭރިއަން ފައިބަރުން މުއްސަނދި އެއްޗެކެވެ. އެހެންކަމުން އެއިން ހަޖަމުކުރުމަށާ، ބަރުދަން ލުއިކުރުމަށް އެހީވެދޭއިރު،  ހިތުގެ ބަލިތަކާއި ޓައިޕް 2 ހަކުރުބަލި ފަދަ ބަލިތައް ޖެހުމުގެ ފުރުސަތު ކުޑަކޮށްދެއެވެ.

Advertisement

3. ކެލޮރީ މަދު: އާންމުކޮށް ފަތުގައި ކެލޮރީ މަދުވުމުން، އަދިވެސް މުހިއްމު ނިއުޓްރިއެންޓްސް ލިބޭއިރު ބަރުދަން އެއްވަރެއްގައި ބެހެއްޓުމަށް މިއީ ރަނގަޅު އެއްޗެކެވެ.

4. އެންޓިއޮކްސިޑެންޓް ޕްރޮޕަޓީސް: ގިނަ ފެހިކަންގަދަ ފަތަކީ އެންޓިއޮކްސިޑެންޓްސް އެކުލެވިގެންވާ އެއްޗެކެވެ. އެހެންކަމުން މިއީ އޮކްސިޑޭޓިވް ސްޓްރެސް އިން ހަށިގަނޑު ރައްކާތެރިކޮށްދީ އެކި ބަލިތައް ޖެހުމުގެ ނުރައްކާ ކުޑަކޮށްދީ، ދުޅަހެޔޮ ދިފާއީ ނިޒާމަކަށް އެހީތެރިވެދޭނެ އެއްޗެކެވެ.

5. ހިތުގެ ދުޅަހެޔޮކަން: ފަތުގައި ހިމެނޭ ނިއުޓްރިއެންޓްސް ކަމަށްވާ ޕޮޓޭސިއަމް އަދި މެގްނީޒިއަމް އަކީ ލޭގެ ޕްރެޝަރު ރެގިއުލޭޓް ކުރުމަށް އެހީތެރިވެދީ ހިތުގެ ބަލިތަކުގެ ނުރައްކާ ކުޑަކޮށްދޭ މާއްދާތަކެކެވެ.

6. ކަށީގެ ދުޅަހެޔޮކަން: ކެލޭ އަދި ކޮލާޑް ގްރީންސް ފަދަ ފަތުގައި ކެލްސިއަމް އާއި ވިޓަމިން ކޭ ގިނައިން ހުންނައިރު، މި ދެ ބާވަތަކީ ވެސް ކަށިތައް ވަރުގަދަކޮށްދީ އަދި ދުޅަހެޔޮ ސިއްހަތެއްގައި ބެހެއްޓުމަށް މުހިއްމު ދެ ބާވަތެކެވެ.

7. ހައިޑްރޭޝަން: ގިނަ ފަތްތަކުގައި ފެން ގިނައިން ހުންނައިރު، މިއީ ހަށިގަނޑަށް ފެން ލިބި ދިނުމަށް އެހީތެރިވެދޭ އެއްޗެކެވެ. 

ކަން މިހެން ހުރުމުން ތަފާތު ފަތްތައް ކެއުމުގައި ހިމެނުމަކީ ސިއްހަތުގެ ދުޅަހެޔޮކަމަށް އެހީތެރިވެދީ، ބެލެންސްޑް އަދި ނިއުޓްރިޝަނަލް ޑައިޓަކަށް އެހީތެރިވެދޭނެ ކަމެކެވެ.