ދިވެހިރާއްޖެއާއި ޖަޕާނާ ދެމެދު އޮތް ޒަމާންވީ ގާތްގުޅުން އިތުރަށް ވަރުގަދަކުރަން ދެ ގައުމުން އެކުގައި ގުޅިގެން މަސައްކަތްކުރަން ބޭނުންވެލައްވާ ކަމަށް އެ ގައުމުގެ އައު ބޮޑުވަޒީރު ޝިގެރޫ އިޝިބާ ވިދާޅުވެއްޖެއެވެ.

މި މަހުގެ އެއްވަނަ ދުވަހު، ޖަޕާނުގެ ބޮޑުވަޒީރުކަމާ ހަވާލުވެވަޑައިގެންނެވި،  ޝިގެރޫ އިޝިބާ އަށް މަރުހަބާ ވިދާޅުވެ، ރައީސް ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓް ރިޕޯސްޓް ކުރައްވަމުން ޝިގެރޫ އިޝިބާ ވަނީ ރައީސް މުޢިއްޒަށް ޝުކުރު ދަންނަވާފައެވެ. 

އަދި، ދެ ގައުމުގެ ދެމެދުގައި އޮތް ޒަމާންވީ ރަހުމަތްތެރިކަމުގެ ގުޅުން އިތުރަށް ބަދަހިކުރުމަށް، ދިވެހި ސަރުކާރާ އެކު ގުޅިގެން މަސައްކަތްކުރައްވާނެ ކަމަށް ވިދާޅުވިއެވެ.

Advertisement

ދެ ގައުމުގެ ގުޅުން އިތުރަށް ބަދަހިކުރަން "ފްރީ އެންޑް އޯޕަން އިންޑޯ-ޕެސިފިކް ސްޓްރެޓެޖީ"ގެ ދަށުން މަސައްކަތްކުރާނަން“ ޝިގުރޫ ވިދާޅުވިއެވެ.

ޝިގެރޫ އިޝިބާގެ ބޮޑު ވަޒީރުކަމާއި ހަވާލުވުމާއި ގުޅިގެން އޭނައަށް މަރުހަބާ ދަންނަވައި ރައީސް ކުރެއްވި ޕޯސްޓުގައި ރައީސް މުޢިއްޒު ވަނީ އެ ގައުމަށް ކާމިޔާބާއި ކުރިއެރުމަށް އެދިވަޑައިގެންފައެވެ.

އަދި، ރާއްޖެއާއި ޖަޕާނާ ދެމެދު އޮތް ޒަމާންވީ ރަޙުމަތްތެރިކަމުގެ ގުޅުން އިތުރަށް ބަދަހިކުރުމަށް ދިވެހި ސަރުކާރާ އެކު މަސައްކަތް ކުރައްވަން އުއްމީދުކުރައްވާ ކަމަށް އެ މަނިކުފާނު ވިދާޅުވިއެވެ.