ސަލާމަތް ސިއްޙަތެއްގެ ދެބައިކުޅަ އެއްބަޔަކީ ނަފްސާނީ ދުޅަހެޔޮކަން ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ. 

މިއަދު ފާހަގަކުރާ، ބައިނަލްއަގުވާމީ ނަފްސާނީ ދުޅަހެޔޮކަމުގެ ދުވަހުގެ ތަހުނިޔާ ހިއްސާކުރައްވައި މީސް މީޑިއާގައި ކުރެއްވި ޕޯސްޓެއްގައި ރައީސް ވިދާޅުވީ، އިންސާނާގެ ސަލާމަތީ ސިއްހަތުގެ ދެބައިކުޅަ އެއްބަޔަކީ ނަފްސާނީ ދުޅަހެޔޮކަން ކަމަށެވެ.

އަދި މުރާލި އަދި އުފެއްދުންތެރި މީހަކަށް ވުމުގައި ނަފްސާނީ ދުޅަހެޔޮކަން މުހިންމު ދައުރެއް އަދާކުރާކަމަށާ، މި ސަބަބުތަކަށްޓަކާ ނަފްސާނީ ދުޅަހެޔޮކަމަށް ހާއްސަ ސަމާލުކަމެއް ދިނުން މުހިންމު ކަމަށް އެމަނިކުފާނު ފާހަގަކުރެއްވިއެވެ. 

Advertisement

ކޮންމެ އަހަރެއްގެ ވެސް އޮކްޓޯބަރު 10 ވަނަ ދުވަހަކީ ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން އިސްނަގައިގެން ނަފްސާނީ ދުޅަހެޔޮކަމުގެ ދުވަހުގެ ގޮތުގައި ފާހަގަކުރާ ދުވަހެވެ.

ނަފްސާނީ ދުޅަހެޔޮކަމާ މެދު ހޭލުންތެރިކުރުވުމުގެ މަގުސަދުގައި މި ދުވަސް ފުރަތަމަ ފާހަގަކޮށްފައި ވަނީ 1992 ވަނަ އަހަރުގަ އެވެ. 

މިއަހަރުގެ ނަފްސާނީ ދުޅަހެޔޮކަމުގެ ތީމެއްގެ ގޮތުގައި ދުނިޔޭގެ ސިއްހަތު ޖަމިއްޔާއިން ކަނޑައަޅާފައި ވަނީ "މެންޓަލް ހެލްތު އެޓް ވޯކް" ނުވަތަ މަސައްކަތުގެ މާހައުލުގައި ނަފްސާނީ ދުޅަހެޔޮކަމެވެ.