ކުރިއަށް އޮތް ވަގުތު ތަކުގައިވެސް ވައި ގަދަވެ، ކަނޑުތައް ވެސް ގަދަވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާ، މެޓު އޮފީހުން މިއަދު ނެރުނު ރީނދޫ ސަމާލު މިރެއާ ހަމައަށް ދަންމާލައިފިއެވެ.

މޫސުމާ ބެހޭ ގައުމީ އިދާރާއިން ވަނީ މިއަދު 11:00 އިން 15:00 އަށް ރ. އަތޮޅުން ފެށިގެން ވ. އަތޮޅާ ހަމައަށް ނެރެފައިވާ ރީނދޫ ސަމާލުގެ މުއްދަތު މިރޭ 7:00 އާ ހަމައަށް ވަނީ ދަންމާލައިފައެވެ.

އެ އިދާރާއިން ބުނެފައިވާ ގޮތުން އެ ސަރަހައްދަށް ގަޑިއަކު 28 މޭލާއި 35 މޭލާ ދެމެދަށް ވައިޖެހި، ވިލާގަނޑުގައި ގަޑިއަކު 55 މޭލަށް ވައިގަދަވާނެ ކަމަށް ލަފާކުވެއެވެ. އަދި، ކަނޑުތައް ވެސް ވަރަށް ގަދަވާނެތީ އެ އިދާރާއިން ވަނީ ސަމާލުވާން އިލްތިމާސްކޮށްފައެވެ.

މީގެ އިތުރުން، ހއ. އަތޮޅުން ފެށިގެން ލ. އަތޮޅަށް ނެރުނު ހުދު ސަމާލުގެ މުއްދަތު ވެސް ވަނީ މިރޭ 9:00 އާ ހަމައަށް ދަންމާލައިފައެވެ.

މެޓް އޮފީހުން ބުނީ ސަމާލު ނެރެފައިވާ ވަގުތު އެ ސަރަހައްދަށް ގުގުރުމާ އެކު ބޯކޮށް ވާރޭވެހޭނެ ކަމަށާ އަދި ގަޑިއަކު 19 މޭލާއި 24 މޭލަށް ވައިޖެހޭއިރު ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށް ލަފާކުރެވޭ ކަމަށެވެ.

މި ދުވަސްވަރަކީ ކަނޑުގަދަ އަދި ވިއްސާރަ ދުވަސް ވަރަކަށް ވުމާއެކު، ކޮންމެހެން ކުރަން ޖެހިއްޖެ ހާލަތުގައި މެނުވީ ކަނޑުދަތުރު ނުކުރުމަށް ފުލުހުން ވަނީ އިލްތިމާސްކޮށްފައެވެ. އަދި ދަތުރުކުރަން ޖެހިއްޖެ ހާލަތުގައި ވެސް ރައްކާތެރިކަމުގެ ފިޔަވަޅު އެޅުމަށާއި ކުދި އުޅަނދުގައި ދަތުރުނުކުރުމަށް އިލްތިމާސްކޮށްފައިވެއެވެ.