ހައިވޭގައި ދުއްވި ސައިކަލެއްގެ ހުންގާނު، ކުޑަކުއްޖަކަށް ހިފަންދިން މައްސަލަ ރައްދުވާ ފަރާތް ފުލުސް އޮފީހަށް ގެންގޮސް ސުވާލުކޮށްފިއެވެ.

މިކަމާ ގުޅޭގޮތުން ފުލުހުން ބުނީ، ހައިވޭގައި ކުޑަކުއްޖަކަށް ސައިކަލްގެ ހުންގާނު ދީގެން ދުއްވި މީހާ ހާޒިރުކޮށް އޭނާ އާ ސުވާލުކޮށްފައިވާކަމަށެވެ. މި މައްސަލާގެ ތެރެއިން ކުޑަކުއްޖަކު ނުރައްކަލަށް ހުށަހެޅޭގޮތަށް ސައިކަލް ދުއްވި މައްސަލަ ވަކިކަމެއްގެ ގޮތުގައި އަދި ޓްރެފިކް ޤަވައިދާ ހިލާފްވި މައްސަލަ ވަކިން ބަލަމުން އަންނަކަމަށްވެސް ފުލުހުން ބުންޏެވެ.

ފުލުހުން ވަނީ މިފަދަ މައްސަލަތައް ސީރިއަސްކޮށް ނަގައި ހަމަޖެހިފައިވާ އުސޫލުން ފިޔަވަޅު އަޅާނެކަމުގެ ޔަގީންކަން ރައްޔިތުންނަށް ދީފައެވެ.

އިއްޔެ މީސްމީޑިއާގައި އާންމުވި ވީޑިއޯއިން ފެންނަ ގޮތުގައި، ސްކޫލް ޔުނީފޯމްގައި އިން ކުޑަ ފިރިހެން ކުއްޖަކު ސައިކަލުގެ ކުރިއަށް ލައިގެން ދިޔަ ފިރިހެނަކު، އެ ސައިކަލުގެ ހުންގާނު ކުއްޖާއަށް ދީގެން އިނދެއެވެ. އޭރު ފަހަތުގައި އިން މީހާ އިނީ، ސައިކަލްގެ ސްޕީޑުން އަތް ދޫކޮށްލައިގެން ކަނާއަތް، ފައި މަތީގައި ބާއްވާލައިގެންނެވެ. އަދިވަކި ހިސާބަކުން ފިރިހެން މީހާ، ހުންގާނުގައި ހިފާތަންވެސް ފެނެއެވެ.

އެއީ ކޮންއިރެއްގެ ވީޑިއޯއެއްކަން ސާފު ނުވި ނަމަވެސް ވީޑިއޯ އާއްމު ވުމާއެކު ގިނަ ބައެއްގެ ފާޑުކިޔުންތައް އެ ފިރިހެން މީހާއަށް ވަނީ އަމާޒުވެފައެވެ. 

ބްރިޖާއި ހައިވޭގައި ޓްރެފިކް ޤަވައިދާ ހިލާފަށް އުޅަނދު ދުއްވާ މީހުންގެ މައްސަލަތައް ދޭތެރެއަކުން ފެންމަތިވެއެވެ. އަދި މިފަދަ މައްސަލަތައް ފުލުހުން އަންނަނީ ހާއްސަ ސަމާލުކަމެއް ދީގެން ބަލަމުންނެވެ. އެގޮތުން މައްސަލަތައް ތަހުގީގުކުރުމަށްފަހު ހަމަޖެހިފައިވާ އުސޫލުގެ ދަށުން ފިޔަވަޅު އަޅާފައިވެސް އެބަހުއްޓެވެ.