ހުޅުމާލޭގައި މިއަދު ހިނގި އެކްސިޑެންޓްގައި ކުޑަކުއްޖެއް ހިމެނޭހެން ހަތަރު މީހަކަށް އަނިޔާވެއްޖެއެވެ.
މި އެކްސިޑެންޓް ހިނގާފައިވަނީ ހުޅުމާލޭ ފޭސް އެކެއްގައި ދެ ސައިކަލެއް ޖެހިގެންނެވެ. މި އެކްސިޑެންޓްގައި ހަތަރު މީހަކަށް އެކިވަރުގެ އަނިޔާތައް ލިބިފައިވާކަމަށް ފުލުހުން ވަނީ ބުނެފައެވެ. މީގެ ތެރޭގައި ކުޑަކުއްޖެއް ހިމެނޭއިރު، އެމީހުންނަށް ވަނީ ހުޅުމާލޭ ހޮސްޕިޓަލުން ފަރުވާދީފައެވެ.
ފުލުހުން ވަނީ މި އެކްސިޑެންޓް ތަހުގީގްކުރަމުންދާކަމަށެވެ.
މިފަހަކަށް އައިސް ހިނގާ އެކްސިޑެންޓްތަކުގައި ކުޑަކުދިން ހިމެނޭ އަދަދު އިތުރުވަމުން އަންނަކަމަށް ފުލުހުން އާއްމުކުރާ މައުލޫމާތުތަކުން އެނގެއެވެ.
މިދިޔަ ބްރާސްފަތިދުވަހު މާލޭގައި ހިނގި އެކްސިޑެންޓެއްގައިވެސް ވަނީ ތިން އަހަރުގެ ކުއްޖަކަށް އަނިޔާވެފައެވެ. އެކުއްޖާއަށް އަނިޔާވީ، ބެލެނިވެރިޔާ ކުއްޖާ ގޮވައިގެން ކަފިހި ހުރަހުން ހުރަސްކުރަނިކޮށެވެ. މި ހާދިސާ ހިނގާފައިވަނީ މަޖީދީމަގު ވިލާމާޓް ކައިރިންނެވެ. އެ އެކްސިޑެންޓްގައި ކުއްޖާ ބިއްމައްޗަށް ވެއްޓި ނިއްކުރިމަތި ވަނީ ދުޅަވެފައެވެ.
އޭގެ ކުރިން ހުޅުމާލޭ ފޭސް އެކަކަށް އަރަންދިޔަ ދެ ސައިކަލެއް ޖެހި ހިނގި އެކްސިޑެންޓްގައި ވަނީ ކުޑަ ކުއްޖެއްގެ ކުޑަވައި އިނގިލި ފަޅައިގެން ގޮސްފައެވެ. ވޮއިސްގެ ނޫސްވެރިންނަށް ފެނުނު މި އެކްސިޑެންޓްގައި އަނިޔާވެފައިވަނީ ސައިކަލް ފަހަތުގައި އިން 8 އަހަރުގެ ކުޑަ ފިރިހެންކުއްޖަކަށެވެ. މީގެ އިތުރުން މިދިޔަ ހުކުރުދުވަހު ކުޑަ އަންހެންކުއްޖެއްގެ ގައިމައްޗަށް ސައިކަލެއް ވެއްޓި ހުޅުމާލޭ ހޮސްޕިޓަލުން ފަރުވާ ހޯދި މަންޒަރު ވޮއިސްގެ ނޫސްވެރިންނަށް ވަނީ ފެނިފައެވެ. ބަލާބެލުމަށް އެއީ 9 ވަރަކަށް އަހަރުގެ ކުއްޖެކެވެ.
މާލެ ސަރަހައްދުގައި ހިނގަމުން އަންނަ އެކްސިޑެންޓްތައް ގިނަވަމުންދާތީ އިތުރު ފުލުހުން މަގުމައްޗަށް ނެރެ، މަގުމަތީގައި ހިނގަމުން އަންނަ އެކްސިޑެންޓްތައް މަދުކުރުމަށް ފުލުހުން ގެންދަނީ އޮޕަރޭޝަނެއް ހިންގަމުންނެވެ.
Advertisement
This content is created and paid for by advertisers and does not involve Voice Journalists
