ރ.އަތޮޅު ކައުންސިލް ހޭންޑްބޯޅަ މުބާރާތް (އަރުތަ ހޭންޑްބޯޅަ 2024) ގެ ފައިނަލުގައި މިއަދު ހަވީރު ކިނޮޅަސް އާއި ދުވާފަރު ކުޅުނު މެޗު ވާދަވެރި ކުޅުމަކަށްފަހު 15-22 ގެ ނަތީޖާއަކުން ކާމިޔާބުކޮށް ކިނޮޅަސް އިން މުބާރާތުގެ ޗެންޕިއަން ހޯދައިފިއެވެ.

ދުވާފަރު މުބާރާތުގެ ފައިނަލުން ޖާގަހޯދީ ސެމީ ފައިނަލުގެ ފުރަތަމަ މެޗުގައި ވާދަވެރި ކުޅުމަކަށްފަހު 11-13 ގެ ނަތީޖާއަކުން މަޑުއްވަރީ ބަލިކުރުމަށްފަހުއެވެ. އަދި ކިނޮޅަސް ފައިނަލުން ޖާގަ ހޯދީ ސެމީ ފައިނަލުގެ ދެވަނަ މެޗުގައި 09-13 ގެ ނަތީޖާއަކުން މީދޫ ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި މޮޅަށް ކުޅެ ކިނޮޅަސް އިން މެޗު ޑޮމިނޭޓްކުރިއިރު، ފުރަތަމަ ހާފުގެ ކުޅުން ނިމިގެންދިޔައީ ހަ ޕޮއިންޓްގެ ލީޑަކާއެކު 13-07 ގެ ނަތީޖާއަކުން ކިނޮޅަސް ކުރީގައި އޮވެގެންނެވެ. އަދި ދެވަނަ ހާފުގައި އެޓީމުން އިތުރު ނުވަ ލަނޑު ކާމިޔާބުކުރިއިރު، މިހާފުގައި ދުވާފަރުން ވެސް އިތުރު އަށް ލަނޑު ކާމިޔާބުކުރިއެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ކިނޮޅަސް ޓީމުގެ ފާތުމަތު ރީމާ އެވެ.

Advertisement

ރ. މީދޫ އެކުވެރި ކުލަބުން އިންތިޒާމުކޮށް މީދޫގައި ކުރިއަށް ގެންދިޔަ މި މުބާރާތުގައި މިއަހަރު ޖުމްލަ ނުވަ ޓީމަކުން ބައިވެރިވިއިރު، މުބާރާތް ކުރިއަށް ގެންގޮސްފައި ވަނީ ބައިވެރިވި ނުވަ ޓީމު ދެ ގުރޫޕަކަށް ބަހާލައިގެންނެވެ. އަދި ކޮންމެ ގުރޫޕަކުން ވެސް އެންމެ ރަނގަޅު ނަތީޖާއެއް ހޯދާ ދެޓީމު ސެމީ ފައިނަލަށް ހޮވޭގޮތަށެވެ.