ރާއްޖޭގައި ވޭޕްކުރުން މަނާކުރުމަށް ރައީސް ޑރ.މުހައްމަދު މުއިއްޒު ނިންމެވި ނިންމެވުމަކީ ޤައުމީ ނިންމެވުމެއްކަމަށް ދާހިލީ ވަޒީރު އަލީ އިހްސާން ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ވަނީ، އަންނަ ނޮވެމްބަރުމަހުގެ 15 ވަނަ ދުވަހުން ފެށިގެން ރާއްޖެއަށް ވޭޕް އެތެރެކުރުން މަނާކުރުމަށް ނިންމަވާފައެވެ. އަދި ޑިސެމްބަރުމަހުގެ 15 ވަނަ ދުވަހުން ފެށިގެން، ވޭޕް މަނާކުރުމަށް ކުރަންޖެހޭ އެންމެހާ ކަންކަން ކުރުމަށް ކަމާބެހޭ ފަރާތްތަކަށް އަންގަވާފައެވެ.

މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ހޯމް މިނިސްޓަރު އިހުސާން ވިދާޅުވެފައިވަނީ، ވޭޕް މަނާކުރަން ނިންމެވި ނިންމެވުމަކީ، މި ޤައުމު ތާއަބަދަށް ޝުކުރުވެރިވާނޭ ޤައުމީ ބޮޑު ނިންމެވުމެއް ކަމަށެވެ. 

Advertisement

މިނިސްޓަރު އިހްސާން ވަނީ ވޭޕް އަކީ ދިވެހިދަރިން މަސްތުގެ މަގަށް ފަސޭހަކަމާއެކު އަނބުރާލާ ކަމެއްގެ ގޮތުގައި ސިފަކުރައްވާފައެވެ.

ރައީސުލްޖުމްހޫރިއްޔާ މިއަދު ވޭޕް މަނާ ކުރާނޭކަން އިއުލާނުކުރައްވާފައިމިވަނީ، ވޭޕް މަނާކުރުމަށް ޑޮކްޓަރުންނާއި އެކިއެކި މުއައްސަސާތަކުގެ އިތުރުން ބެލެނިވެރިންވެސް ގޮވާލާފައިވަނިކޮށްކަން ފާހަގަކޮށްލެވެއެވެ.

ވޭޕް މަނާކުރުމަށް އެދި ދިވެހި ޑޮކްޓަރުންގެ އެންމެބޮޑު މަދަނީ ޖަމިއްޔާ، މޯލްޑިވްސް މެޑިކަލް އެސޯސިއޭޝަނުން ބުނެފައިވަނީ، މުޅި ދުނިޔެއަށާއި ދިވެހި ރާއްޖޭގައިވެސް މިއަދު ކުރިމަތިލާންޖެހިފައިވާ އެންމެ ބޮޑު ގޮންޖެހުމަކީ ގައިން ގަޔަށް ނާރާ ބަލިތައްކަމަށާއި،  ދުންފަތާއި ދުންފަތުގެ ބާވަތްތައް ބޭނުންކުރުމަކީ މިފަދަ ބަލިތަކަށް މަގުފަހިކުރުވުމަށް އިސް ރޯލެއް އަދާކުރާ ކަމެއްކަން ދިރާސާތަކުން ފާހަގަކުރެވިފައިވާ ކަމަށެވެ. މިފަދަ ބަލިތަކުގެ ތެރޭގައި ނޭވާލާ ނިޒާމުގެ ބަލިތަކާއި، ހިތުގެ ބަލިތަކާއި، ހަކުރުބަލި އަދި ސްޓްރޯކް ހިމެނޭކަމަށް އެ ބަޔާނުގައި ވަނީ ބުނެފައެވެ.

ރާއްޖޭގައި އުމުރުން 18 އަހަރުވުމުގެ ކުރިން ދުންފަތުގެ އިސްތިއުމާލުކުރާކަން ހެދިފައިވާ ދިރާސާތަކުން ދައްކާކަން ފާހަގަކުރަމުން އެ ޖަމިއްޔާގެ ބަޔާނުގައި ބުނެފައިވަނީ، ދުންފަތަކީ އެތައް ހާސް ކެމިކަލް މާއްދާ އާއި 250 ވިހަ އެކުލެވޭ އެއްޗެއް ކަމަށެވެ. މީގެ ތެރެއިން 70 މާއްދާއިން ކެންސަރަށް މަގުފަހިކުރުވާކަން ދިރާސާތަކުން ދައްކާކަމަށްވެސް މެޑިކަލް އެސޯސިއޭޝަނުގެ ބަޔާނުގައި ވަނީ ބުނެފައެވެ.