އެއާޕޯޓް ލަގެޖު އުފުލާ އުޅަނދެއް ތަނެއްގައި ޖެހި، ހިނގި އެކްސިޑެންޓެއްގައި ދިވެއްސަކު ނިޔާވެއްޖެއެވެ.
މި ހާދިސާގައި ނިޔާވެފައި ވަނީ އެ އުޅަނދު ދުއްވަންއިން، 45 އަހަރުގެ ދިވެހި ފިރިހެނެކެވެ.
ފުލުހުން ބުނީ، އެއާޕޯޓް ލަގެޖު އުފުލާ އުޅަނދެއް ދުއްވާފައި ދަނިކޮށް، އެޕްރޮން އޭރިއާގައި، ލައިޓް އާއި ކެމެރާ ހަރުކޮށްފައިހުރި ސްޓްރަކްޗަރ އެއްގެ ބުޑުގަނޑުގައިޖެހި އެކްސިޑެންޓެއް ހިނގާފައިވާ ކަމަށެވެ.
އަދި އެ އުޅަނދު ދުއްވަން އިން މީހާ ކްލިނިކަށް ގެންދިޔުމަށްފަހު، އައިޖީއެމްއެޗަށް ގެންގޮސްފައިވާ ކަމުގެ މައުލޫމާތު މިއަދު 9:28 ކަންހާއިރު ލިބުފައިވާ ކަމަށެވެ.
ހޮސްޕިޓަލާ ހަވާލާދީ ފުލުހުން އިތުރަށް ބުނީ، ކްލިނިކަށް ގެންދިޔަ އިރުވެސް އޭނާ މަރުވެފައިވާ ކަމަށާ އައިޖީއެމްއެޗަށް ގެންގޮސް އިތުރަށް ބެލިބެލުމުން ބޭރުފުށުން އެއްވެސް އަނިޔާއެއް ލިބިފައި ނުވާކަމަށެވެ.
ނިޔާވި މިހާގެ އާއިލާއިން ވޮއިސް އަށް މައުލޫމާތު ދިން ގޮތުގައި މި ހާދިސާ ހިނގާފައިވަނީ މިއަދު ހެނދުނު ގާތްގަނޑަކަށް 6:00 ހާއިރުއެވެ. އަދި މި އުޅަނދު ތަނެއްގައި ޖެހިފައިވަނީ، ދުއްވަން އިންމީހާ އަށް ސްޓްރޯކެއް ޖެހި ޚަބަރު ހުސްވިފަހުން ކަމަށް ބެލެވޭ ކަމަށްވެސް ބުންޏެވެ.
މި މައްސަލަ ފުލުހުން އަންނަނީ ތަހުގީގު ކުރަމުންނެވެ.
Advertisement
This content is created and paid for by advertisers and does not involve Voice Journalists
