ސަރުކާރުގެ އަމާޒަކީ ވިލިމާލޭގައި އެޅުމަށް ނިންމާފައިވާ ހޮސްޕިޓަލުގެ މަސައްކަތް ދެ އަހަރުދުވަހުގެ ތެރޭގައި ނިންމައި ހިދުމަތްދޭން ފެށުންކަމަށް އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ވަނީ ވިލިމާލޭގައި 100 އެނދުގެ ހޮސްޕިޓަލެއް އެޅުމަށް ނިންމާފައެވެ. މިއީ ރައީސް ޑރ.މުއިއްޒު ޗައިނާއަށް ކުރެއްވި ދަތުރުފުޅުގެ ތެރެއިން ހަމަޖެހިގެންދިޔަ މަޝްރޫޢުއެކެވެ.

ސަރުކާރުން މިއަދު ވަނީ ވިލިމާލޭގައި އެޅުމަށް ނިންމާފައިވާ ހޮސްޕިޓަލުގެ ޓެންޑަރިން މަސައްކަތުގެ އެއްބަސްވުމުގައި ޗައިނާ ސަރުކާރާއެކު ސޮއިކޮށްފައެވެ. އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ އިމާރާތްކުރުމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބެވެ. ޗައިނާގެ ފަރާތުން ސޮއިކުރެއްވީ ޗައިނާއިން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު ވަން ލިޝިންއެވެ.

Advertisement

އެއްބަސްވުމުގައި ސޮއިކުރެއްވުމަށްފަހު ބިނާރާބެހޭ ވަޒީރު މުއްޠަލިބް ވިދާޅުވީ, ހޮސްޕިޓަލުގެ ޓެންޑަރިން މަސައްކަތް ކުރިއަށްގެންދިއުމަށް ހަ މަސްދުވަހުގެ މުއްދަތެއް ނަގާނޭ ކަމަށާއި، މި މުއްދަތުގެ ތެރޭގައި ހޮސްޕިޓަކުގެ މަސައްކަތް ކުރާނޭ ކުންފުންޏެއް ކަނޑައެޅިގެންދާނޭ ކަމަށެވެ. އުއްމީދަކީ އަންނަ އަހަރުގެ ތެރޭގައި ހޮސްޕިޓަލް އިމާރާތް ކުރުމުގެ މަސައްކަތް ފެށިގެންދިއުންކަމަށް މުއްތަލިބް ވިދާޅުވިއެވެ.

އެގޮތުން 2027 ވަނަ އަހަރުގެ ތެރޭގައި ވިލިމާލޭގައި އަޅާ މި ހޮސްޕިޓަލް ޓާޝިއަރީ ފެންވަރުގައި ތަރައްޤީކުރެވިގެންދާނޭކަމަށް މިނިސްޓަރު ފާހަގަކުރެއްވިއެވެ.

ވިލިމާލޭގައި އަޅާ މި ހޮސްޕިޓަލް ހިންގުމުގެ ކަންކަން ކުރިއަށްދާނީ އައިޖީއެމްއެޗްގެ ދަށުންނެވެ.