ގދ. ނަޑެއްލާ ޖެޓީ މަގުގައި ރޭ ދަންވަރުގެ ވަގުތެއްގައި ހިނގި ނުރައްކާތެރި އެކްސިޑެންޓެއްގައި ތިން މީހުންނަށް އަނިޔާވެ، އޭގެ ތެރެއިން ދެ މީހަކު ފަރުވާއަށް މާލެ ގެނެސްފިއެވެ.

ފުލުހުން ބުނީ، ނަޑެއްލާ ޖެޓީ މަގުން ބާރު ސްޕީޑުގައި ދުއްވަމުން ދިޔަ ސައިކަލެއް ކޮންޓްރޯލް ނުވެ، މަޑުކޮށްފައި އޮތް ރަށު ޕިކަޕެއް ކައިރީގައި ހުރި މީހެއްގެ ގައިގައި ޖެހިފައިވާ ކަމަށް ރޭ ދަންވަރު 12:05 ހާއިރު ރިޕޯޓް ކޮށްފައުވާ ކަމަށެވެ.

އަދި މި އެކްސިޑެންޓުގައި ސައިކަލުގައި ތިބި ދެ މީހުންނާއި (ދެ މީހުންވެސް 18 އަހަރު) އަދި ޕިކަޕް ކައިރީގައި ހުރި މީހާ (47 އަހަރު) އަށް އަނިޔާވެގެން ތިނަދޫ ޑރ. އަބްދުލް ސަމަދު މެމޯރިއަލް ހޮސްޕިޓަލަށް ގެންގޮސްފައިވާ ކަމަށެވެ.

Advertisement

މީގެ އިތުރުން ފުލުހުން ބުނީ، ސައިކަލް ދުއްވި މީހާއާއި ޕިކަޕް ކައިރީގައި ހުރި މީހާ މިއަދު މާލެ ގެނެސް އޭޑީކޭ ހޮސްޕިޓަލުގައި ދަނީ ފަރުވާދެމުންދާ ކަމަށެވެ. 

ފުލުހުންގެ މަޢުލޫމާތުން އެނގޭގޮތުގައި ސައިކަލް ދުއްވާފައިވަނީ ލައިސަންސް ނެތް މީހެކެވެ.

މި މައްސަލަ ފުލުހުން ދަނީ ތަޙުޤީޤު ކުރަމުންނެވެ.