ދުނިޔޭގެ އިގްތިސާދީ ގޮތުން އެންމެ ކުރިއަރާފައިވާ 5 ޤައުމު ކަމަށްވާ، ޗައިނާ، ރަޝިއާ، އިންޑިއާ، ބްރެޒިލް އަދި ދެކުނު އެފްރިކާ އެކުވެގެން 2009 ވަނަ އަހަރު އުފައްދާފައިވާ "ބްރިކްސް ސަމިޓް" ރަޝިއާގެ ކަޒާންގައި ފެށިގެން ކުރިއަށްދާއިރު، ދުނިޔޭގެ ލީޑަރުންގެ އެންމެބޮޑު ސަމާލުކަމެއް މިވަގުތު ލިބިފައި ވަނީ މި ސަމިޓަށެވެ. ބްރިކްސްގައި މި 5 ގައުމުގެ އިތުރުން އަމަލީގޮތުން ދެން ހަރަކާތްތެރިވަނީ، އީރާން، އިތިއޯޕިއާ، މިސްރު، ސައުދީ، އަދި ޔޫއޭއީ އެވެ. މި ޤައުމުތަކުގެ ތެރެއިން އާޖެންޓީނާ އަދި ވެނެޒުއެލާއިންވެސް ވަނީ ބްރިކްސްގައި ބައިވެރިވާނޭކަން ހާމަކޮށްފައެވެ.

ބްރިކްސް ސަމިޓަށް ދުނިޔޭގެ ލީޑަރުންގެ ކަޅި އަމާޒުވެފައިވާއިރު، މިފަހަރުގެ ބްރިކްސް ސަމިޓްގައި ނިންމޭ ނިންމުންތަކުން ދުނިޔޭގެ ސިޔާސީ މަސްރަހުގެ ކުރިމަގު ކަނޑައެޅިގެންދާނޭކަމަށް ސިޔާސީ މަޝްރަހު ދިރާސާކުރާ ފަރާތްތަކުން ބުނެއެވެ. ބްރިކްސް ސަމިޓްގައި ދުނިޔޭގެ ލީޑަރުން އެންމެ އިންތިޒާރުކުރައްވަމުން މިހާރު ގެންދަވަނީ ރަޝިއާގެ ރައީސް ވްލަޑިމިއާ ޕުޓިންގެ ބަސްމަގު ބަހައްޓަވާނޭ ގޮތުގެ މައްޗަށެވެ. 

ކަޒާންގައި މިހާރު ކުރިއަށްދާ ބްރިކްސް ސަމިޓްގެ ކަންކަން ކުރިއަށްދާގޮތް އެންމެ ގާތުން ފާރަވެރިވަމުންދަނީ އިސްރާއީލްގެ މީޑިއާތަކެވެ. ބްރިކްސް ސަމިޓްގެ މިހާހިސާބަށް އާއިރު، މުހިއްމު ދެކަމަކާ ގުޅޭގޮތުން ރަޝިއާ އާއި ޗައިނާއިން ވަނީ ވާހަކަދައްކާފައެވެ. އެއްކަމަކީ އިންޓަރނޭޝަނަލް ޕޭމަންޓްގައި އެމެރިކާ ޑޮލަރު ބޭނުންކުރުން ހުއްޓާލުމަށް ރަޝިއާގެ ރައީސް ވްލަޑިމިއާ ޕުޓިން ދެއްކެވި ވާހަކަފުޅެވެ.

އަނެއް ކަމަކީ، އިސްރާއީލުން ފަލަސްތީނުގައި ހިންގަމުންދާ ނިރުބަވެރި ހަރަކާތްތައް މިހާރުން މިހާރަށް ހުއްޓާލުމާ ގުޅޭގޮތުން ޗައިނާގެ ރައީސް ޝީ ޖިން ޕިން ވިދާޅުވި ވިދާޅުވުމެވެ. 

ބްރިކްސް ސަމިޓްގެ ތެރެއިން.. ފޮޓޯ/ ބްރިކްސް

ބްރިކްސް ސަމިޓްގެ ތެރެއިން ވާހަކަތަކާ މަޝްވަރާތަކުގެ ބޮޑު ބައެއް ނިމިގެން ގޮސްފައިވާއިރު، ހުރިހާ ކަމެއްގެ ތެރެއިންވެސް އިސްރާއީލްގެ މީޑިއާތަކަށް އެންމެ އަޅައިގަތް ކަމަކަށްވީ، ރަޝިއާގެ ރައީސް ވްލަޑިމިއާ ޕުޓިން އާއި ބްރިކްސްގެ މެމްބަރު ގައުމެއްގެ ގޮތުގައި މިހާރު ހަރަކާތްތެރިވާ އީރާނުގެ ރައީސް މައްސޫދު ޕެޒޭޝިއަން ދެ ބޭފުޅުންގެ ބައްދަލުވުމެވެ. އިސްރާއީލާ އެމެރިކާގެ ވިޔަފާރިވެރިން ގުޅިގެން ފަންޑުކޮށްގެން ހިންގަމުންދާ އިސްރާއީލް ޓައިމްސްއިން ވަނީ އެ ދެ ބޭފުޅުން ސަލާންކުރައްވާ ފޮޓޯއެއް ހިމަނައި ހަބަރެއް ޝާއިއުކޮށްފައެވެ. 

އިސްރާއީލް ޓައިމްސްއިން ބުނީ ވްލަޑިމިއާ ޕުޓިން އާއި މައްސޫދުގެ މި ބައްދަލުވުމަކީ ދެ ރައީސުންގެ ފުރަތަމަ ބައްދަލުވުން ކަމަށާއި، މި ބައްދަލުވުމުގައި ދެ ޤައުމުގެ ދެމެދުގައި ވަރަށް ފުރިހަމަޔަށް އެއްބާރުލުން ދިނުމާ ގުޅޭގޮތުން ޕުޓިން އިސްވެ ވާހަކަފުޅު ދައްކަވާފައިވާކަމަށެވެ. މީގެ އިތުރުން މެދުއިރުމަތީގެ މައްސަލަ އާއި ސޫރިއާގެ މައްސަލައާ ގުޅޭގޮތުންވެސް ދެ ރައީސުންގެ ދެމެދުގައި މަޝްވަރާކޮށްފައިވާކަމަށް އިސްރާއީލް ޓައިމްސްއިން ރިޕޯޓްކޮށްފައި ވެއެވެ.

މިފަހުން އީރާނުން އިސްރާއީލަށް ދިން މިސައިލް ހަމަލާތަކާ ގުޅިގެން މެދުއިރުމަތީގެ މަޝްރަހު ވަނީ ވަރަށްބޮޑަށް ގޯސްވެފައެވެ. މި މައްސަލާގައި އިސްރާއީލުން އީރާނަށް ހަމަލާދިނުމަށް ތައްޔާރުވިނަމަވެސް، އެމެރިކާއިން ވަކިއެއްޗެއް ނުބުނާތީވެ އިސްރާއީލް އަދި އޮތީ ހިމޭނުންނެވެ. އިސްރާއީލުން އީރާނަށް ހަމަލާދޭން ކިތަންމެ ބޭނުންވިއަސް އެކަން ނުކުރެވި އަދި އޮތީ ރަޝިއާއިން ދިން އިންޒާރަކާ ގުޅިގެންނެވެ. ރަޝިއާއިން ބުނެފައިވަނީ އިސްރާއީލުން އީރާނަށް ހަމަލާ ދީފިނަމަ، ރަޝިއާއިން ބަލަން ނޯންނާނެ ކަމަށެވެ.

ދުނިޔޭގެ ސިޔާސީ މަޝްރަހު ދިރާސާކުރާ ފަރާތްތަކުން ބުނާގޮތުގައި އިސްރާއީލަށް ވާގިވެރިވެ ދީގެން އީރާން ކަހަލަ ގޮތްނޭނގޭ ޤައުމަކާ ދެކޮޅަށް ހަނގުރާމައެއް ފަށާކަށް އެމެރިކާ ބޭނުމެއް ނުވެއެވެ. މިކަމުގައި ސަބަބުތައްވެސް ބައިވަރެވެ. އޭގެ ތެރޭގައި އެމެރިކާއިން އީރާގް އަދި އަފްޢާނިސްތާނުގައި ކުރި ހަނގުރާމަތަކުގެ މަގްސަދު ހާސިލްނުވެ އެޤައުމަށް މާލީގޮތުން ބޮޑެތި ގެއްލުންތަކެއް ލިބި އެމެރިކާގެ ރައްޔިތުން އެކަންކަން ބަލައި ނުގަތުމާއި، ރަޝިއާއިން އިންޒާރު ދީފައި އޮއްވައި އިޒްރާއީލުން އީރާނަށް ހަމަލާދީފިނަމަ، ދެން ވާނެގޮތެވެ. 

ކަންކަން އެގޮތަށް ހުރިއިރު، ބްރިކްސް ސަމިޓްތެރެއިން ރަޝިއާގެ ރައީސް ޕުޓިން އިސްނަންގަވައި އީރާގެ ރައީސް އާ ބައްދަލުކުރެއްވުންތައް ބާއްވައި އީރާނަށް އެއްބާރުލުން ދޭނޭކަމަށް ހާމަކުރި ކުރުމަކީ އެމެރިކާ އަދި އިސްރާއީލަށް ތަހައްމަލު ކުރެވޭވަރުގެ ކަމަކަށް ނުވާނޭކަމަށް ސިޔާސީ މަޝްރަހު ދިރާސާކުރައްވާ ފަރާތްތަކުން ބުނެއެވެ.