އަދުގެ ސަރުކާރު ވަނީ ހުދުމުހުތާރު ވެރިކަމަކާ ދިމާލަށް މިސްރާބް ޖަހާފައިކަމަށް އެމްޑީޕީގެ ރައީސް ޢަބްދުﷲ ޝާހިދު ވިދާޅުވެއްޖެއެވެ.

ދައުލަތުގެ ހަރަދުތައް ކުޑަކުރުމުގެ ގޮތުން ރައީސުލްޖުމްހޫރިއްޔާ އާއި ސިޔާސީމީހުންގެ އިތުރުން ސަރުކާރު ކުންފުނިތަނުގެ ބައެއް މުއައްޒަފުންގެ މުސާރަ ކުޑަކުރުމަށް ރައީސުލްޖުމްހޫރިއްޔާ ޑރ.މުއިއްޒު ނިންމެވުމާ ގުޅިގެން އެކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ޝާހިދު ވިދާޅުވީ، ސަރުކާރުގެ ބޭކާރު އިސްރާފު ޚަރަދުތައް ކުޑަ ނުކޮށް، ރައްޔިތުން އަތުން ޓެކްސް ބޮޑުކޮށް، ހަމަ އެ ރައްޔިތު މީހާގެ މުސާރައިން ބައެއް ނެގުމަށް ނިންމާފައިވާކަމަށެވެ.

ޝާހިދު ވިދާޅުވީ ރައްޔިތު މީހާގެ މުސާރައިން ބައެއް ނެގުމަށް ނިންމިކަމީ، ރައްޔިތުން ދޫކޮށް އަމިއްލަ ޖާހަތަށް ޚުދުމުޚްތާރު ވެރިކަމަކަށް ސަރުކާރު މިސްރާބުޖެހި ކަމުގެ ރަނގަބީލެއް ކަމަށެވެ. 

Advertisement

ހަރަދުތައް ކުޑަކުރުމަށް ވެރިންނާއި ސިޔާސީ އަދި ބައެއް ކުންފުނިތަކުގެ މުއައްޒަފުންގެ މުސާރަ ކުޑަކުރުމަށް ނިންމުމުން އެމްޑީޕީން ވަނީ އެކަމަށް ވަރަށްބޮޑަށް ފާޑުކިޔާފައެވެ.

މިކަމާ ގުޅޭގޮތުން އެމްޑީޕީގެ ޗެއާޕާސަން ފައްޔާޒް އިސްމާއީލް ވިދާޅުވީ, އާންމު ރައްޔިތުން އަތުން އަދި ވިޔަފާރިތަކުން ނަގާ ޓެކްސް އެތައް ތަނަކުން ބޮޑުކޮށްފައި، ސިޔާސީ ވަޒީފާތަކުގެ މުސާރައިން 10 އިންސައްތަ އުނިކުރަން ނިންމި ނިންމުމަކީ ދެބޯގެރިދުއްވުން ކަމަށެވެ. ދެ ބޯގެރި ދުއްވުމަކީ ކަމެއްގެ ވާހަކަ އޮއްބާލުމަށް ބޮޑުކޮށްގެން ދައްކާ އެހެން ވާހަކައެކެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު ވަނީ ކުރިއަށްއޮތް 2025 ވަނަ އަހަރަށް ދައުލަތުގެ ބަޖެޓު ހުށަހަޅާއިރު، އިޤްތިޞާދީ އިޞްލާޙީ އެޖެންޑާގެ ދަށުން، ދައުލަތުގެ ޚަރަދުތައް ކުޑަކުރުމުގެ މަޤްޞަދުގައި ސަރުކާރުގެ ވެރިންނާއި ސިޔާސީ އަދި ބައެއް ކުންފުނިތަކުގައި މަސައްކަތްކުރާ މުއައްޒަފުންގެ މުސާރަ ވަކި އުސޫލެއްގެ ދަށުން ކުޑަކުރުމަށް ނިންމާފައެވެ. 

އެގޮތުން ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައިން %10 އުނިކުރުމަށް ނިންމަވާފައިވާއިރު، ބޭންކްތައް ފިޔަވައި ސަރުކާރު ހިއްސާވާ ކުންފުނިތަކުގެ މުވައްޒަފުންގެ މުސާރައިންވެސް ވަނީ %10 އުނިކުރުމަށް ނިންމާފައެވެ. އަދި ހަމަ އެހެންމެ ކުންފުނިތަކުގެ ވެރީންނަށް އެންމެ ބޮޑުކޮށް ދެވޭނީ 90،000 ރުފިޔާ ކަމަށް ވަނީ ނިންމާފައެވެ.