ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ދޫކޮށްފައިވާ ނޮޅިވަރަންފަރު ހައުސިން ޔުނިޓުތައް ލިބޭ މީހުންގެ ވަގުތީ ލިސްޓް ބާތިލްކުރަންޖެހޭކަމަށް ހިއުމަން ރައިޓްސް ކޮމިޝަން އޮފް ދަ މޯލްޑިވްސްއިން ހާމަކޮށްފިއެވެ.

ހދ.ނޮޅިވަރަންފަރުގައި އިމާރާތްކޮށްފައިވާ 100 ހައުސިންގ ޔުނިޓް ދޫކުރުމަށް ހަމަޖެހިފައިވާ އުސޫލު" ގައި، ރައްޔިތުން ކަންބޮޑުވާ ކަންތައްތަކެއް ހުރިކަމަށް ބުނެ އެރަށުގެ 279 މީހަކު ވަނީ އެޗްއާރުސީއެމަށް ޕެޓިޝަނެއް ހުށަހަޅާފައެވެ. މި ޕެޓިޝަނުގައި ފާހަގަކޮށްފައިވާ ކަންކަން ބެލުމަށްފަހު އެޗްއާރުސީއެމުން ވަނީ އެފަރާތުގެ ރަޢުޔު ހާމަކޮށްފައެވެ.

މައްސަލަ ތަހުގީގުކުރުމަށްފަހު އެޗްއާރުސީއެމުން ބުނީ، ތަޙުޤީޤުން ފާހަގަ ކުރެވޭ ކަންކަމަށް ރިޢާޔަތްކުރާއިރު، މި އުސޫލު މިހާރު އެކުލަވާލާފައި އޮތް ގޮތުގެ ސަބަބުން، ހައުސިންގ ޔުނިޓްތައް ދިނުމަށް ކަނޑައަޅައިފިނަމަ، ހައުސިންގ ޔުނިޓަށް އެދި ފޯމު ހުށަހަޅާފައިވާ ފަރާތްތަކަށް ޤާނޫނުއަސާސީއާއި ޤާނޫނުތަކުން ކަށަވަރުކޮށްދީފައިވާ ޙައްޤުތައް ގެއްލިގެން ދިއުމުގެ ފުރުޞަތު އެބައޮތް ކަމަށެވެ. މިކަމުގެ ކަންބޮޑުވުން ފާހަގަކުރަމުން އެޗްއާރުސީއެމުން ބުނީ، މައްސަލައިގެ ތަޙްޤީޤު ނިމުނުގޮތުގެ ރިޕޯޓުގައި ފާހަގަކޮށްފައިވާ ކަންކަމަށް ރިޢާއަތްކުރާއިރު މި އުސޫލު އިސްލާހުކޮށް، މިހާރު ފޯމު ހުށަހަޅާފައިވާ ފަރާތްތަކުގެ ފޯމް އަލުން ރީ-އިވެލުއޭޓް ކުރުމަކީވެސް އެންމެ އިންސާފުވެރި ގޮތް ކަމަށް ނުބެލެވޭ ކަމަށެވެ. 

Advertisement

އެހެންކަމުން ހދ.ނޮޅިވަރަންފަރުގައި އިމާރާތްކޮށްފައިވާ 100 (ސަތޭކަ) ހައުސިންގ ޔުނިޓު ދިނުމަށް މިހާރު އިއުލާނުކޮށްފައިވާ ވަގުތީ ލިސްޓު ބާތިލް ކުރުމަށާއި، މި ހައުސިންގ ޔުނިޓުތައް ދޫކުރުމުގެ އުސޫލުގައި ހުރި މި ރިޕޯޓުގައި ބަޔާންކޮށްފައިވާ ކަންބޮޑުވުންތަކަށް ހައްލެއް ލިބިގެންދާނެ ގޮތަށް އުސޫލު އިސްލާހުކޮށް، އަލުން އިޢުލާނު ކުރުމަށާއި އަދި އުސޫލު އިސްލާހުކޮށް އަލުން އިޢުލާނު ކުރުމަށް އެޗްއާރުސީއެމުން ވަނީ ބުނެފައެވެ.

އެޗްއާރުސީއެމުން ވަނީ ޤާނޫނުއަސާސީއާއި ކަމާގުޅުންހުރި ޤާނޫނުތަކުން ކަށަވަރުކޮށްދީފައިވާ ހައްޤުތައް ހަނިނުވާނޭ ގޮތަށް އުސޫލު އެކުލަވާލުމަށް ހިއުމަން ރައިޓްސް ކޮމިޝަނުގެ ޤާނޫނުގެ 26 ވަނަ މާއްދާގެ (ހ) ގެ ދަށުން ތިލަދުންމަތީ ދެކުނުބުރި ނޮޅިވަރަންފަރު ކައުންސިލްގެ އިދާރާއަށް އަންގާފައެވެ.

އެޗްއާރުސީއެމުން ބުނީ ކޮމިޝަނުގެ އެންގުމާއި އެއްގޮތަށް ޢަމަލުކޮށްފައިނުވާނަމަ، ހިއުމަން ރައިޓްސް ކޮމިޝަނަށް ލިބިދީފައިވާ ބާރުގެ ދަށުން ފިޔަވަޅު އަޅާނޭކަމަށެވެ. 

އެޗްއާރުސީއެމުން ވަނީ ހައުސިން ޔުނިޓުތަކާ ގުޅޭގޮތުން ތަޙްޤީޤްކޮށްފައިވާ މައްސަލައާ ގުޅިގެން ނިންމާފައިވާ ގޮތް ނޮޅިވަރަންފަރު ކައުންސިލްގެ އިދާރާ އާއި ހައުސިންގ، ލޭންޑް އެންޑް އަރބަން ޑިވެލޮޕްމަންޓްގެ އިތުރުން ލޯކަލް ގަވަރމަންޓް އޮތޯރިޓީ އަދި މައްސަލަ ހުށަހެޅި ފަރާތާ ވާނީ ހިއްސާކޮށްފައެވެ.

ނޮޅިވަރަންފަރު ހައުސިން ޔުނިޓްތަކަކީ މީގެ 12 އަހަރުކުރިން އަޅަންފެށި ހައުސިން ޔުނިޓްތަކެކެވެ.މި ހައުސިން ޔުނިޓްތަކުގެ ތެރެއިން ނޮޅިވަރަންފަރުގެ ރައްޔިތުންނަށް ހާއްސަކޮށްފައިވަނީ 75 ޔުނިޓެވެ. އަނެއް 25 ޔުނިޓް ދެނީ އެރަށަށް ބަދަލުވި މީހުންނަށެވެ.