ވެރިކަންކުރާ މައިޕާޓީ، ޕީޕަލް ނެޝަނަލް ކޮންގްރެސް، (ޕީއެންސީ) އަށް އޮޅުވާލައިގެން މެމްބަރުން ވައްދަން ނުޖެހޭނޭކަމަށް އެޕާޓީގެ ޗެއާޕާސަން އަދި ރައްޔިތުން މަޖިލީހުގެ ރައީސް ޢަބްދުއްރަހީމް ޢަބްދުﷲ ވިދާޅުވެއްޖެއެވެ.
މާލެ ސަރަހައްދުން ޕީއެންސީއަށް މެމްބަރުން އިތުރުކުރުމަށް ފުރި ފޯމްތައް ހަވާލުކުރުމަށް މިރޭ ބޭއްވި ހަފްލާގައި ވާހަކަދައްކަވަމުން ޢަބްދުއްރަހީމް ވަނީ ޕީއެންސީއަށް މެމްބަރުން ހޯދުމަށް އިދިކޮޅު އެމްޑީޕީން މިއަދު ކުރި ތުހުމަތުތަކަށް ރައްދު ދެއްވާފައެވެ.
އިދިކޮޅު މައި ޕާޓީ، އެމްޑީޕީން ނެރުނު ބަޔާނެއްގައި ބުނެފައިވަނީ، ޕީއެންސީއަށް މެމްބަރުން އިތުރުކުރުމަށްޓަކައި ދައުލަތުގެ މުއައްސަސާތަކުގެ ނުފޫޒު ފޯރުވަމުންދާކަމަށާއި، އަދި އެކަމުގެ ޝަކުވާތައްވެސް ލިބެމުން އަންނަކަމަށެވެ. އެކަމަކީ އެމްޑީޕީން ކަންބޮޑުވާ ކަމެއްކަމަށް އެޕާޓީން ވަނީ ބުނެފައެވެ.
އެމްޑީޕީގެ ވާހަކަތަކަށް ރައްދުދެއްވައި ޢަބްދުއްރަހީމް ވިދާޅުވީ ނުފޫޒުންނާއި، ފައިސާ ދީގެން ޕީއެންސީއަށް މެމްބަރުން ވައްދަން ނުޖެހޭނޭކަމަށެވެ. ޢަބްދުއްރަހީމް ވިދާޅުވީ ސޮއި ފޯޖުކޮށްގެންނާއި، ފައިސާ ދީގެން ޕާޓީއަށް މީހުން ވައްދާނީ ތާއީދުނެތް ސިޔާސީ ލީޑަރުން ހިންގާ ޕާޓީތަކަށް ކަމަށެވެ. ޕާޓީއަށް މެމްބަރުން ވެއްދުމަށް ފޯމް ފުރުމަކީ ކިހާވަރެއްގެ ކަމެއްކަން އެނގޭކަމަށާއި، ޑީއާރުޕީ، ޕީޕީއެމް އަދި ޕީއެންސީ އުފެއްދުމަށް މެމްބަރުން ހޯދުމަށް ކުރެވުނު މަސައްކަތްތަކުން އެކަމުގެ ތަޖުރިބާ ފިސާރި ރަނގަޅަށް ލިބިފައިވާކަމަށް އަބްދުއްރަހީމް ވަނީ ފާހަގަކުރައްވާފައެވެ.
އޭނާ ވިދާޅުވީ ޕީއެންސީއަށް ރައްޔިތުންގެ ލޯތްބާއި ތާއީދު އެބައޮތްކަމަށާއި، އެހެންކަމުން އޮޅުވާލައިގެން އެ ޕާޓިއަށް މީހުން ވައްދަންޖެހޭކަމަށް އެމްޑީޕީން އެ ދައްކާ ވާހަކައިގެ ހަގީގަތެއް ނެތްކަމަށެވެ.
ސަރުކާރު އޮފީސްތަކާއި ކުންފުނިތައް މެދުވެރިކޮށް ނުފޫޒުން ޕީއެންސީއަށް މެމްބަރުން ވައްދަމުންދާކަމަށް އެމްޑީޕީން ތުހުމަތުކުރާ މައްސަލާގައި އަބްދުއްރަހީމް ވިދާޅުވީ ސަރުކާރުގެ ވުޒާރާތަކާއި އެކުންފުނިތަކުގެ މެނޭޖިންގ ޑިރެކްޓަރުންގެ ގޮތުގައި ތިއްބަވާނީ ޕީއެންސީއަށް ނިސްބަތްވާ މީހުންކަމަށާއި، ޕާޓީ ބޮޑުކުރުމަކީ އެ ބޭފުޅުންގެ ޒިއްމާއެއް ކަމަށެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގެންނެވިއިރު ޕީއެންސީގެ މެމްބަރުންގެ ގޮތުގައި 3،022 މީހުންތިބި ނަމަވެސް މިއަދު އެ ޕާޓީއަކީ އެންމެބޮޑު ޕާޓީކަމުގައި ހެދިއްޖެކަމަށް އަބުދުއްރަހީމް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
