ކުރިއަށް އޮތް އަހަރަށް ސަރުކާރުން ހުށަހަޅާފައިވާ ބަޖެޓްގައި 8،782 މަގާމު އިތުރުވާކަމަށް އެމްޑީޕީ ސަރުކާރުގެ މާލީ ވަޒީރު އިބްރާހިމް އަމީރު ވިދާޅުވެއްޖެއެވެ.
އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އަމީރު ވިދާޅުވީ، 2025 ވަނަ އަހަރަށް ހުށަހަޅާފައިވާ ބަޖެޓްގައި، ގާތްގަނޑަކަށް ބައި ލައްކަ މުއައްޒަފުންގެ މުސާރައަށް 14 ބިލިއަން ރުފިޔާ ހިމަނާފައިވާކަމަށެވެ.
މުއައްޒަފުންގެ އަދަދު 2023 ވަނަ އަހަރާއި އަޅާ ބަލާއިރު 37 އިންސައްތަ އިތުރުވެފައިވާކަމަށާއި، 2024 ވަނަ އަހަރާއި އަޅާ ބަލާއިރު، 20 އިންސައްތަ އިތުރުވެގެންދާކަމަށް އަމީރު ވިދާޅުވިއެވެ. އަމީރު ވިދާޅުވީ، 2023 ވަނަ އަހަރުގެ ބަޖެޓުގައި ހިމެނުނީ 42،823 މުއައްޒަފުންކަމަށާއި، 2025 ވަނަ އަހަރު 51،605 މުއައްޒަފުން ހިމަނާފައިވާއިރު މިއީ 8،782 މަގާމުގެ އިތުރުވުމެއް ކަމަށެވެ.
"2025 ވަނަ ހުށަހަޅާފައި އިން ބަޖެޓްގައި އެބަ ހިމަނާފައިވޭ 51،705 މުއައްޒަފުންނަށް މުސާރަދޭނެ ކަމަށް ބަޖެޓްގައި ހިމަނާފައިވޭ. އެހެންވީމަ ގާތްގަނޑަކަށް 8،782 މަގާމު އެބަ އިތުރުވޭ 2025 ވަނަ އަހަރަށް ހުށަހަޅާފައިވާ ބަޖެޓްގައި،"
އަމީރު ވިދާޅުވިއެވެ.
އަމީރު ވިދާޅުވީ، ފެނިގެންދަނީ ހަރަދު ކުޑަ ކުރުމުގެ ސިޔާސަތުތަކެއް ގެންނަން ޖެހޭ ދަނޑިވަޅެއްގައި، ދައުލަތުގެ މުއައްޒަފުންފެ އަދަދު އިންތިހާއަށް އިތުރުވެގެންދާތަން ކަމަށާއި، މީގެ ތެރޭގައި ގިނައީ ސިޔާސީ ގޮތުން ނެގޭ މުއައްޒަފުން ކަމަށެވެ.
މިނިސްޓްރީތަކާއި އެމްބަސީތައް ހުޅުވައި، މުއައްޒަފުން އިތުރުކުރާވަރަކަށް ޑޮލަރަށް އޮންނަ ޑިމާންޑް ބޮޑުވެ، ރާއްޖޭގައި އޮތް ޕެރެލަލް މާކެޓްވެސް އިތުރަށް ގޯސްވާނެކަން ފާހަގަވެގެންދާކަމަށް އަމީރު ވިދާޅުވިއެވެ.
Advertisement
This content is created and paid for by advertisers and does not involve Voice Journalists
