މިއަދު ޤައުމު ސަލާމަތުން މިއޮތީ ކޮވިޑާއި ގުޅިގެން އެމްޑީޕީ ސަރުކާރުން އެޅި ފިޔަވަޅުތަކުގެ ސަބަބުންކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
އެމްޑީޕީން ބޭއްވި "ފުދިއްޖެ ފުނޑިއްޖެ" ޖަލްސާގައި ވާހަކަދައްކަވަމުން ރައީސް ސޯލިހު ވިދާޅުވީ، އެމްޑީޕީ ސަރުކާރުން ލޯނުތައް ނެގި ވާހަކަ ދައްކާއިރު، އެކަން ކުރަންޖެހުނު ސަބަބާއި މިއަދު ހާލަތު އޮތްގޮތާއި އަޅާކިޔަން ޖެހޭ ކަމަށެވެ. ކޮވިޑް ތެރޭގައި ކަންވެގެން ދިޔަގޮތުން ދުނިޔެ ދެކެފައިނުވާވަރުގެ އާލަމީ ވަބާއެއް ކުރިމަތިވެގެން ދިޔަކަމަށާއި އެކަމުގެ ސަބަބުން ދައުލަތަށް ލިބެމުން އައި އާމްދަނީ ހުއްޓުމަކަށް އައިކަމަށެވެ.
ދައުލަތުގެ ރިޒާވްފައި އޭރު ފައިސާނެތްކަން ފާހަގަކުރައްވަމުން ރައީސް ސޯލިހު ވިދާޅުވީ، ރައީސް ޔާމީނު ވެރިކަން ނިމިގެންދިޔައިރު ދައުލަތުގެ ރިޒާވްގައި އެއެް ބިލިއަން ޑޮލަރު ހުންނާނޭކަމަށް ވިދާޅުވަމުންދިޔަ ނަމަވެސް އެއީ ކަނޑައެޅިގެން ބުހުތާނު ދޮގެއް ކަމަށެވެ.
ރައީސް ސޯލިހު ވިދާޅުވީ، ރައީސް ޔާމީނުގެ ވެރިކަމުގެ ދައުރު ނިމުނުއިރު، ދައުލަތުގެ ރިޒާވްގައި ހުރީ 572 މިލިއަން ޑޮލަރު ކަމަށެވެ. އަދި ބޭނުން ކުރެވޭ ރިޒާވްގައި 200 މިލިއަން ޑޮލަރުވެސް ނެތްކަމަށެވެ. ދައުލަތުގެ ރިޒާވްގައި އެއްޗެއް ހުރިނަމަ ހުރީ ޖީއެމްއާރަށްދީ ނިންމާފައިކަން ރައީސް ފާހަގަކުރެއްވިއެވެ.
ދައުލަތެއްގެ އެ އޮންނަ ވެރިކަމެއްގެ ބޭނުމަކީ ރައްޔިތުންނަށް ޖެހޭ ދަތި އުނދަގޫ ދަނޑިވަޅުތަކުގައި އެހީތެރިވެ ދިނުން ކަމަށާއި މިގޮތުން ކުރިމަތިވި ކޮވިޑްގެ އާލަމީ ވަބާގެ ތެރޭގައި މުސާރަބަރާބަރަށް ދެވުނުއިރު، ވަޒީފާއިން އެއްވެސް މީހަކު ވަކިކޮށްފައި ނުވާއިރު، ރިސޯތްތަކުގެ ކުލިވެސް ފަސްކޮށްދެވުނު ކަމަށެވެ.
މީގެ އިތުރުން ވިޔަފާރިތަކަށް ލޯނާއި އެހީތެރިކަންވެސް ދީފައިވާނޭކަން ފާހަގަކުރައްވަމުން ރައީސް ސޯލިހު ވިދާޅުވީ މިއަދު މިހާލަތުގައި ޤައުމު ފެންނަން މިއޮތީ އޭރު އެޅި ފިޔަވަޅުތަކުގެ ސަބަބުންކަމަށް ރައީސް ވިދާޅުވިއެވެ.
އަޅުގަނޑު ކެރިގެން މިދަންނަވަނީ އެއީ (ލޯނުތައް ނެގުމަކީ) ކުރެވުނު ރަނގަޅު ކަމެކޭ. މިއަދު މިގައުމު ސަލާމަތްވެފައި މިއޮތީ އެދުވަހު އަޅުގަނޑުމެން ކުރި މަސައްކަތުން. 2022 ވަނަ އަހަރާ ހަމަޔަށް އާއިރު އިގްތިސާދު އޭރު އޮތް ހާލަތަށް ދިޔައީ އެރު އެގޮތަށް ހެދީމައި
ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ މިއަދު މިފެންނަނީ އިގްތިސާދު ހުއްޓިފައި އޮތްތަން ކަމަށާއި ދުނިޔެއަށް އިގްތިސާދީ ގޮތުން ލޮޅުމެއް ނައިސް ރާއްޖޭގެ މާލީ ހާލަތު މިހާ ދަށަށް މިދިޔައީ ހިންގަން ނޭނގުނުކަމުން ކަމަށެވެ.
މި ޖަލްސާގައި ރައީސް ސޯލިހު ވިދާޅުވީ އަދުގެ ސަރުކާރުގެ މިޝްރާބު މިއަދު ހުރީ ބާރުތަށް މުށުތެރެއަށް ލައިގެން 2028 ވަނަ އަހަރުގެ ރިޔާސީ އިންތިހާބު ފޭރިގަންނަން ކަމަށެވެ.
މި މޭރުމުން ވާހަކަފުޅު ދައްކަވަމުން ރައީސް ސޯލިހު ވަނީ މިނިވަން މުއައްސަސާތަކުގެ ބައެއް ވެރިންނާއި މެމްބަރުން ވަކިކުރުމަށް ސަރުކާރުން ކުރަމުންގެންދާ މަސައްކަތަށް ވަރަށްބޮޑަށް ފާޑުވިދާޅުވެ ވާހަކަދައްކަވާފައެވެ. ރައީސް ސޯލިހު ވިދާޅުވީ، ސަރުކާރުން މަސައްކަތް ކުރަމުންދަނީ ބާރުތައް މުށުތެރެއަށް ޖަމާކޮށް 2028 ވަނަ އަހަރު ބާއްވާ ރިޔާސީ އިންތިހާބު ފޭރިގަންނަން ކަމަށެވެ.
ރައީސް ސޯލިހްވަނީ މިކަންކުރަން ސަރުކާރަށް ފުރުސަތު ދީގެން ނުވާނޭކަން ފާހަގަކުރައްވައި، އެކަމާ ދެކޮޅަށް އެންމެން ތެދުވަން ޖެހޭކަން ފާހަގަކުރެައްވާފައެވެ.
Advertisement
This content is created and paid for by advertisers and does not involve Voice Journalists
