ޑޮލަރު މާރުކުރުމުގެ އައު ގަވާއިދުގެ ދަށުން މިހާތަނަށް ރަޖިސްޓްރީވެފައި ނުވަނީ އެންމެ ރިސޯޓަކުންކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހާމަކޮށްފިއެވެ.

ޑޮލަރު މާރުކުރުމުގެ އައު ގަވާއިދަށް އަމަލުކުރުން ހުއްޓާލުމަށް ރާއްޖޭގެ ޓޫރިޒަމް ސިނާއަތުގެ އެންމެބޮޑު އެއް ވިޔަފާރިވެރިޔާ ޗަމްޕާ މުހައްމަދު މޫސާ (އުއްޗު) އެދިވަޑައިގެން މަރުކަޒީ ބޭންކުގެ ގަވަރުނަރަށް ފޮނުވި ސިޓީއެއް މީސްމީޑިއާގައި ވަނީ ދައުރުވެފައެވެ. 

މިކަމާ ގުޅިގެން މަރުކަޒީ ބޭންކުން މިރޭ ބުނީ، ބޭރުފައިސާއާ ބެހޭ ގަވާއިދުގެ ދަށުން އެމްއެމްއޭގައި ރާއްޖޭގައި އޮޕަރޭޓްކުރާ އެކެއް ރިސޯޓު ފިޔަވައި އެހެން ހުރިހާ ރިސޯޓަކުން ރަޖިސްޓަރީ ވެފައިވާކަމަށެވެ. ރަޖިސްޓްރީ ނުވަނީ ކޮން ރިސޯޓަކުންކަން މަރުކަޒީ ބޭންކަކުން ނުބުނެއެވެ.

މީސްމީޑިއާގައި ދައުރުވަމުން އަންނަ ސިޓީއަށް ބަލާއިރު، ޑޮލަރު މާރުކުރުމުގެ އައު އުސޫލަށް އަމަލުކުރުން ހުއްޓާލުމަށް އެދި އުއްޗު ގަވަރުނަރަށް ސިޓީ ފޮނުވާފައިވަނީ، ޗަމްޕާ އާއިލާއަށް ނިސްބަތްވާ ބައެއް ރިސޯޓްތައް ހިންގަމުން އަންނަ ކުރެއްދޫ ހޯލްޑިންގްސް ކުންފުނީގެ ލެޓާހެޑުގައެވެ. 

އުއްޗު ފޮނުވި ސިޓީގައި ވިދާޅުވެފައިވަނީ، ރިސޯޓަށް އަންނަ ފަތުރުވެރިންގެ ނިސްބަތުން ކޮންމެ މަހަކު ބޮލަކަށް 500 ޑޮލަރުގެ ރޭޓުން ބޭންކަށް ޑޮލަރު މާރުކުރުމަކީ ވިޔަފާރީގެ އުސޫލުން ދެމެހެއްޓެނިވި ގޮތަކަށް ކުރެވޭނެ ކަމެއް ނޫންކަމަށެވެ. އެގޮތުން މިއީ ވިޔަފާރިތަކަށް ގެއްލުންބޮޑު ކަމެއްކަމަށް އުއްޗުގެ ސިޓީގައި ވަނީ ފާހަގަކުރައްވާފައެވެ.

ސިޓީގައި އުއްޗު ވިދާޅުވީ ޓޫރިޒަމް ވިޔަފާރިވެރިންނާ މަޝްވަރާކުރުމެއްނެތި އަމަލުކުރުމަށް ނިންމި ޑޮލަރު މާރުކުރުމާ ބެހޭ އައު ގަވާއިދު އަލުން މުރާޖައާކުރުމަށް އެދިވަޑައިގަންނަވާފައެވެ. އުއްޗު ވިދާޅުވީ އެދިވަޑައިގެންނެވިގޮތަށް މިކަމުގައި ސަރުކާރުން އަވަސް ފިޔަވަޅެއް އަޅުއްވާނޭކަން ޔަގީންކުރާ ކަމަށާއި، ސަރުކާރާއެކު މިކަމުގައި އެއްގަލަކަށް އަރައިގެން ވާހަކަދެއްކުމަށް ތައްޔާރަށް އޮތްކަމަށެވެ. 

އެންމެ ރިސޯޓެއް ފިޔަވައި ދެންހުރި ހުރިހާ ރިސޯޓަކުން ޑޮލަރު މާރުކުރުމަށް ރަޖިސްޓްރީވެފައިވާއިރު ރާއްޖޭގައި މިހާރު އޮޕަރޭޓްކުރަމުން އަންނަ 174 ރިސޯޓް އެބައޮތެވެ.

މަރުކަޒީ ބޭންކުން ވަނީ، ރާއްޖޭގައި ހިންގާ ވިޔަފާރިތަކުގެ ތެރެއިން ޓޫރިޒަމް ވިޔަފާރިކުރާ ފަރާތްތަކުން ރާއްޖޭގެ ބޭންކްތަކަށް ޑޮލަރު މާރުކުރުން ލާޒިމްވާގޮތަށްއޮކްޓޯބަރުމަހުގެ އެއްވަނަ ދުވަހު، އައު އުސޫލެއް އެކުލަވާލާފައެވެ.

މަނީޗޭންޖިން ވިޔަފާރިއާ ބެހޭ ޤަވައިދުގެ ދަށުން އެމްއެމްއޭއިން ވަނީ ރާއްޖޭގައި ޓޫރިޒަމް ވިޔަފާރިކުރާ ތަންތަނަށް، އެތަންތަނަށް ވަންނަ ޑޮލަރު އާމްދަނީން ވަކި އިންސައްތައެއް ރާއްޖޭގެ ބޭންކުތައް މެދުވެރިކޮށް މާރުކުރުމަށް ލާޒިމްކޮށްފައެވެ. އެގޮތުން ކެޓަގަރީ އޭގައި ހިމެނޭ، ޓޫރިސްޓް ރިޒޯޓުތަކާއި، ހޮޓާތަކާއި، އުޅަނދުތަކާއި އެނޫންވެސް އެފަދަ ތަންތަނުން ކޮންމެ ޓޫރިސްޓަކަށް 500 ޑޮލަރުގެ ރޭޓުން މީލާދީ މަހެއްގައި އައިސްފައިވާ ޖުމްލަ ޓޫރިސްޓުންނަށް ޖެހޭ އަދަދު ބޭންކަކަށް ރުފިޔާއަށް މާރުކުރަން ޖެހޭ ގޮތަށް ވަނީ ހަމަޖައްސާފައެވެ.

ކެޓަގަރީ ބީގައި ހިމެނޭ ތަންތަނުން މާރުކުރަންޖެހޭކަމަށް ކަނޑައަޅާފައިވަނީ ޓޫރިސްޓަކަށް 25 ޑޮލަރެވެ. ކެޓަގަރީ ބީގެ ގޮތުގައި ކަނޑައަޅާފައިވަނީ 50 ކޮޓަރި، ނުވަތަ އެއަށްވުރެ މަދުން ކޮޓަރި ހުންނަ ތަންތަނެވެ.