ޑޮލަރު މާރުކުރުމާ ގުޅޭގޮތުން މަރުކަޒީ ބޭންކުން މިފަހުން ހެދި ގަވާއިދު މުރާޖައާކޮށްދިނުމަށް ރާއްޖޭގެ އެންމެބޮޑު ރިސޯޓް އޮޕަރޭޓްކުރާ ކުންފުނި، ޔުނިވާސަލް އިން އެދިއްޖެއެވެ.
މޯލްޑިވްސް މަނިޓަރީ އޮތޯރިޓީ، (އެމްއެމްއޭ) ގެ ގަވަރުނަރަށް ފޮނުވި ސިޓީފުޅެއްގައި ޔުނިވާސަލްގެ ޗެއާމަން މުހައްމަދު އުމަރު މަނިކު (އެމްޔޫ މަނިކު) ޑޮލަރު މާރުކުރުމުގެ އައު ގަވާއިދަށް އަމަލުކުރުމުގައި ގޮންޖެހުންތަކެއް އެބަހުރި ކަމަށެވެ. މި ސިޓީގައި އެމްޔޫމަނިކް ވިދާޅުވެފައިވަނީ، ޑޮލަރު މާރުކުރުމުގެ ގަވާއިދު މިހާރު އޮތްގޮތުން ރިސޯޓް ވިޔަފާރިތަކަށް ގޮންޖެހުންތަކެއް އެބަހުރި ކަމަށެވެ.
ޑޮލަރު މާރުކުރުމުގެ ގަވާއިދު އެކުލަވާލާފައިވަނީ ޓޫރިޒަމް އިންޑަރސްޓްރީގެ ވިޔަފާރިވެރިންނާ މަޝްވަރާނުކޮށްކަން މި ސިޓީގައި ވަނީ ފާހަގަކޮށްފައެވެ. ރިސޯޓްތަކަށް ކުރާ ހަރަދުގެ ބޮޑު އިންސައްތަ ހޭދަކުރަނީ ޑޮލަރުންކަމަށާއި، އަދި ރިސޯޓްތަކަށް އަންނަ ފަތުރުވެރިން އެމީހުންގެ ދަރިން ގޮވައިގެން އަންނައިރު، ގަވާއިދު ހެދިއިރު މިކަންކަމަށް ވިސްނާފައި ނުވާކަން ސިޓީގައި ވަނީ ފާހަގަކޮށްފައެވެ.
އެމްޔޫ މަނިކުގެ ސިޓީގައި ވިދާޅުވެފައިވަނީ މިކަމުގައި މަޝްވަރާއަށްގޮސް ޓޫރިޒަމް ވިޔަފާރިއަށް ގެއްލުން ނުވާނޭ ފަދަ ގޮތަކަށް ޑޮލަރު މާރުކުރުމުގެ އުސޫލު ގާއިމްކުރަން ޖެހޭ ކަމަށެވެ.
ޑޮލަރު މާރުކުރުމުގެ ގަވާއިދު އިސްލާހުކުރަންޖެހޭ ކަމަށް އެމްޔޫމަނިކް ފާހަގަކޮށްފައިވާއިރު، ޓޫރިޒަމްގެ އެންމެ ބޮޑު އެއް ވިޔަފާރިވެރިޔާ ޗަމްޕާ މުހައްމަދު މޫސާ ވެސް ވަނީ އެ ގަވާއިދު މުރާޖައާކޮށް އިސްލާހުކުރަންޖެހޭކަމަށް ވިދާޅުވެފައެވެ.
އުއްޗު ފޮނުވި ސިޓީގައި ވިދާޅުވެފައިވަނީ، ރިސޯޓަށް އަންނަ ފަތުރުވެރިންގެ ނިސްބަތުން ކޮންމެ މަހަކު ބޮލަކަށް 500 ޑޮލަރުގެ ރޭޓުން ބޭންކަށް ޑޮލަރު މާރުކުރުމަކީ ވިޔަފާރީގެ އުސޫލުން ދެމެހެއްޓެނިވި ގޮތަކަށް ކުރެވޭނެ ކަމެއް ނޫންކަމަށެވެ. އެގޮތުން މިއީ ވިޔަފާރިތަކަށް ގެއްލުންބޮޑު ކަމެއްކަމަށް އުއްޗުގެ ސިޓީގައި ވަނީ ފާހަގަކުރައްވާފައެވެ
Advertisement
This content is created and paid for by advertisers and does not involve Voice Journalists
