އަންނަ އަހަރުގެ ބަޖެޓްގައި އިޖުތިމާއީ ރައްކާތެރިކަން ކަށަވަރުކުރުމަށް ރެކޯޑް އަދަދެއް ހިމަނައިފިއެވެ.

ސަރުކާރުން 2025 އަހަރަށް ލަފާކުރާ ބަޖެޓް މަޖިލީހަށް ހުށަހެޅިއިރު، އިޖުތިމާއީ ރައްކާތެރިކަމަށް 3.9 ބިލިއަން ރުފިޔާގެ ބަޖެޓެއް ވަނީ ކަނޑައަޅާފައެވެ. މިއީ މިއަހަރަށް ބަޖެޓްގައި ކަނޑައެޅި އަދަދާ އަޅާބަލާއިރު، 1.1 ބިލިއަން ރުފިޔާގެ އިތުރުވުމެކެވެ. މިއަހަރަށް މުރާޖަާކުރި ބަޖެޓަށް ބަލާއިރު، އިޖުތިމާއީ ރައްކާތެރިކަމަށް ކަނޑައަޅާފައިވަނީ 2.8 ބިލިއަން ރުފިޔާއެވެ.

އިޖުތިމާއީ ރައްކާތެރިކަަމަށް ކަނޑައެޅި އަދަދަށް ބަލާއިރު އެންމެބޮޑު ހޭދައެއް ހިނގާނޭކަމަށް ލަފާކޮށްފައިވަނީ، އުމުރުން ދުވަސްވީ ފަރާތްތަކަށް ކުރާ ހަރަދުތަކަށެވެ. މިގޮތުން އަންނަ އަހަރުގެ ބަޖެޓްގައި އުމުރުންދުވަސްވީ ފަރާތްތަކަށް ކުރާ ހޭދައިގެ ގޮތުގައި 1.4 ބިލިއަން ރުފިޔާ ވަނީ ބަޖެޓްގައި ޖަހާފައެވެ.

ދައުލަތުން އުމުރުން ދުވަސްވީ މީހުންނަށް ދޭ އިނާޔަތްތަކަށް ބަލާއިރު، ކަނޑައެޅިފައިވާ އުސޫލުން ކޮންމެ މަހަކު ޖަމާކުރަމުންދާ ފައިސާގެ އިނާޔަތުގެ އިތުރުން ދައުލަތުގެ ހަރަދުގައި އުމުރުންދުވަސްވީ މީޙުން ބެލެހެއްޓުމަށް ކުރާ ހަރަދުތައް ފާހަގަކޮށްލެވެއެވެ.

އުމުރުން ދުވަސްވީ މީހުންގެ އިތުރުން އަންނަ އަހަރުގފެ ބަޖެޓުގައި ދެން އެންމެބޮޑު ހޭދައެއް ކުރާގޮތަށް ކަނދައެޅިފައިވަނީ، ކުޑަކުދިންނާއި އާއިލާތަކަށް ދޭ އެހީއެވެ. މިބަޔަށް 1.2 ބިލިއަން ރުފިޔާ ހޭދަވާނޭކަމަށް ލަފާކޮށްފައިވާއިރު، ހާއްސަ އެހީއަށް ބޭނުންވާ ފަރާތްތަކަށް އަންނަ އަހަރުގެ ބަޖެޓްގައި ދޭ އަދަދުވެސް ވަނީ އިތުރުކޮށްފައެވެ. މިއަހަރުގެ ބަޖެޓްގައި ހާއްސައެހީއަށް ބޭނުންވާ ފަރާތްތަކަށް ދިނުމަށް 681.2 މިލިއަން ރުފިޔާ ހިމަނާފައިވާއިރު، އަންނަ އަހަރުގެ ބަޖެޓްގައި ވަނީ 711.3 މިލިއަން ރުފިޔާ ހިމަނާފައެވެ.

ދައުލަތުގެ ބަޖެޓުން ހާއްސައެހީއަށް ބޭނުންވާ މީހުންނަށް މީގެ ކުރިން ފިކްސްޑް އެލަވަންސެއް ދިން ނަމަވެސް މިހާރު އެފަރާތްތަކަށް އެލަވަންސް ދެނީ ބަލިމީހާގެ ހާލަތަށް ބަލައިގެންނެވެ. މިގޮތުން މަހެއްގެ މައްޗަށް ބައެއް މީހުނަށް ހަ ހާހަށްވުރެ ބޮޑު އަދަދެއް ދެމުންދާއިރު، އެންމެ މަދުންލިބޭ ފަރާތަށްވެސް ތިންހާސް ރުފިޔާ ޖަމާކުރަމުންދެއެވެ.