ޑޮލަރު މާރުކުރުމުގެ ޤަވާއިދު ބަދަލު ނުކުރައްވާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ރައީސް ޑރ.މުއިއްޒު މިހެން ވިދާޅުވީ ސަރުކާރަށް އަހަރުވުމުގެ މުނާސަބާ ފާހަގަކުރުމަށް މިހާރު ކުރިއަށްދާ ޖަލްސާގައި ވާހަކަދައްކަވަމުންނެވެ.

ޑޮލަރު މާރުކުރުމަށް އެމްއެމްއޭއިން މިފަހުން އެކުލަވާލި އައު އުސޫލް ބަދަލުކުރުމަށް ރާއްޖޭގެ ފަތުރުވެރިކަމުގެ ސިނާއަތުގެ ބާނީންގެ ގޮތުގައި ފާހަގަކުރެވޭ ބައެއް ބޭފުޅުން ވަނީ ސަރުކާރަށް ގޮވާލާފައެވެ. މީގެ ތެރޭގައި ޗަމްޕާ މުހައްމަދު މޫސާ އާއި ޔުނިވާސަލްގެ ޗެއާމަން މުހައްމަދު އުމަރު މަނިކު ހިމެނެއެވެ.

Advertisement

އެބޭފުޅުންގެ އެ ވާހަކަތަކާ ގުޅިގެން ރައީސް ޑރ.މުއިއްޒު ތަކުރާރުކޮށް ހަރުއަޑުފުޅުން މިރޭ ވިދާޅުވީ، ޑޮލަރު މާރުކުރުމުގެ އުސޫލަށް ބަދަލު ގެނެވެން ނެތްކަމަށެވެ.

ރައީސް ވިދާޅުވީ 1972 ވަނަ އަހަރު ރާއްޖެއަށް ތައާރަފްވި ފަތުރުވެރިކަމުގެ ސިނާއަތް މިއަދު މިހާހިސާބަށް އައިސްފައިވަނީ ބައެއްގެ ބުރަ މަސައްކަތުން ކަމަށެވެ. ރައީސް ވިދާޅުވީ، އެބޭފުޅުންނަށް ނިހާޔަތަށް އިހުތިރާމްކުރައްވާ ކަމަށާއި އެބޭފުޅުންގެ ހިދުމަތް ޝުކުރުވެރިކަމާއެކު ފާހަގަކުރައްވާކަމަށެވެ.

ރައީސް ޑރ.މުއިއްޒު ވަނީ ޓޫރިޒަމް ވިޔަފާރިވެރިންގެ ކިބައިން ސިޔާސީގޮތުން ބަޔަކު ނާޖާއިޒް ފައިދާނެގިޔަ ނުދީ ސަރުކާރާއި ގުޅި ރައްޔިތުންގެ ލާބައަށް މަސައްކަތްކޮށްދެއްވުމަށް އެދިވަޑައިގަންނަވާފައެވެ.

މިމޭރުމުން އިތުރަށް ވާހަކަދައްކަވަމުން ރައީސް ޑރ.މުއިއްޒު ވަނީ އަންނަ ޖެނުއަރީމަހުން ފެށިގެން ޑޮލަރު މާރުކުރުމުގެ ގަވާއިދަށް އަމަލުކުރަން ފައްޓަވާނޭ ކަމަށާއި، އެއުސޫލަށް ބަދަލު ގެނެވެން ނެތްކަމަށް ވިދާޅުވެފައެވެ.