މީޑިއާ ކޮންޓްރޯލްކުރާ ބިލް ބަލައިގަތުމަށް ޕީއެންސީގެ ޕާލިމަންޓްރީ ގްރޫޕުން ވޯޓު ނުދޭނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ސަރުކާރަށް އެއް އަހަރު ފުރުން ފާހަގަކުރުމަށް ޒުވާނުންގެ މަރުކަޒުގައި ބޭއްވި ރަސްމިއްޔާތު ނިންމަވާލެއްވުމަށްފަހު، ނިކުމެ ވަޑައިގެންްނެވިތަކުން ނޫސްވެރިއަކު ކުރި ސުވާލަކަށް ޖަވާބުދެއްވަމުން ރައީސް ވިދާޅުވީ، މަޖިލީހަށް ހުށަހަޅާފައިވާ އެ ބިލް ޕީއެންސީ ޕާލިމެންޓްރީ ގްރޫޕުން ވޯޓު ނުދެއްވާނޭ ކަމަށާއި އެ ބިލް ބޭރުކުރާނޭ ކަމަށެވެ.

އަދި އެކަމާ ޝައްކު ނުކުރުމަށް ރައީސް ވަނީ ވިދާޅުވެފައެވެ. ރައީސްގެ އެ ޖަވާބާ ގުޅިގެންމޯލްޑިވްސް ޖާނަލިސްޓް އެސޯސިއޭޝަނުން ވަނީ ރައީސްގެ އެ ނިންމެވުމާއި ދެއްވި ޔަގީންކަން ފާހަގަކޮށް ދިވެހި ނޫސްވެރިންގެ ނަމުގައި ޝުކުރު ދަންނަވާފައެވެ.

މީޑިއާ ކޮންޓްރޯލް ކުރާ ބިލް މައްސަލާގައި މިއަދު ބަންޑާރަނައިބު އަޙްމަދު އުޝާމް ވެސް ވަނީ ނޫސްވެރިންގެ ކަންބޮޑުވުންތަކަށް ހައްލު ހޯއްދަވައިދެއްވާނެ ކަމުގެ ޔަގީންކަން ދެއްވާފައެވެ.

ހަންނާން ހުށަހެޅުއްވި ބިލުގައި ވާގޮތުން، މި ގާނޫނުގެ ދަށުން އުފައްދާ ކޮމިޝަނުން އެކުލަވާލާ ނޫސްވެރިކަމުގެ ސުލޫކީ މިންގަނޑާ ތަކުރާރުކޮށް ހިލާފު ވެއްޖެ ނަމަ 5،000 ރުފިޔާ އާއި 50،000 ރުފިޔާ އާ ދެމެދުގެ އަދަދަކުން ނޫސް މަޖައްލާ ޖޫރިމަނާ ކުރެވޭ އިރު، އަދި ވަކިވަކި ނޫސްވެރިން ވެސް 5،000 ރުފިޔާ އާއި 10،000 ރުފިޔާ އާ ދެމެދުން ޖޫރިމަނާ ކުރެވޭނެއެވެ.

މި ގާނޫނުން އުފައްދާ ކޮމިޝަނުގައި ހަތް މެންބަރުން ތިބޭއިރު އެ ކޮމިޝަނުގެ ދައުރަކީ ފަސް އަހަރެވެ.

އަދި މަޖިލީހަށް ހުށަހެޅުނު މި ބިލު ގާނޫނަކަށް ވުމުން، ބްރޯޑްކާސްޓިން ކޮމިޝަން (ބްރޯޑްކޮމް) އާއި، މޯލްޑިވްސް މީޑިއާ ކައުންސިލް (އެމްއެމްސީ) އުވޭނެއެވެ.